മൂവാറ്റുപുഴ: മഗ്‌രിബ് നിസ്‌കാരം കഴിഞ്ഞ് വീട്ടിലേക്ക് മടങ്ങുകയായിരുന്ന വിദ്യാര്‍ഥിയെ കാറിലെത്തിയ സംഘം തട്ടിക്കൊണ്ടു പോകാന്‍ ശ്രമിച്ചു. പായിപ്ര പഞ്ചായത്തിലെ മുളവൂര്‍ പള്ളി പടിയില്‍ ഇന്നലെ വൈകിട്ട് ഏഴ് മണിയോടെയാണ് സംഭവം. മുളവൂര്‍ മുളാട്ട് അബ്ദുല്‍ സലാമിന്റെ മകന്‍ അഫ്രിന്‍സലാമി(10) നെയാണ് കാറിലെത്തിയ മൂന്നംഗ സംഘം തട്ടിക്കൊണ്ടു പോകാന്‍ ശ്രമിച്ചത്.
മുളവൂര്‍ പള്ളിയില്‍ മഗ്‌രിബ് നിസ്‌കാരം കഴിഞ്ഞ് തൊട്ടടുത്തുള്ള വീട്ടിലേക്ക് നടന്നു പോകുന്നതിനിടെ എത്തിയ കാര്‍ കുട്ടിയുടെ മുന്നില്‍ നിര്‍ത്തിയ ശേഷം അഫ്രിനെ കാറിലേക്ക് വലിച്ചു കയറ്റാന്‍ ശ്രമിക്കുകയായിരുന്നു.
ഭയന്നു പോയ അഫ്രിന്‍ ബഹളം വച്ച് കുതറി മാറി ഓടി രക്ഷപ്പെടുകയായിരുന്നു. ഷര്‍ട്ട് ബട്ടന്‍സ് പൊട്ടി ശരീരത്തില്‍ നിന്ന് ഊരി പോയതു മൂലമാണ് കുട്ടിക്ക് രക്ഷപ്പെടാനായത്. പിടിവലിയില്‍ കുട്ടിക്ക് പരുക്കേറ്റിട്ടുണ്ട്. ബഹളം കേട്ട് സമീപവാസികളും മറ്റും ഓടിയെത്തിയതോടെ കാര്‍ ഓടിച്ചു പോകുകയായിരുന്നു. വെള്ള സാന്‍ട്രോ കാറിലെത്തിയവരാണ് തട്ടിക്കൊണ്ടു പോകാന്‍ ശ്രമിച്ചത്. വിവരമറിഞ്ഞ് മൂവാറ്റുപുഴ പൊലിസ് സ്ഥലത്തെത്തി അന്വേഷണം ആരംഭിച്ചു.