നേമം: പ്രാവച്ചമ്പലം കേന്ദ്രീകരിച്ച് കഞ്ചാവ് മാഫിയ സജീവമാകുന്നു. പ്രാവച്ചമ്പം റെയില്‍വേ സ്റ്റേഷന്‍ പരിസരം , ചാനല്‍ക്കര ബണ്ട് , പ്രാവച്ചമ്പലം- കാട്ടാക്കട റോഡില്‍ റെയില്‍വേ മേല്‍പ്പാലത്തിനു ചുറ്റു വട്ടം തുടങ്ങിയ സ്ഥലങ്ങളിലാണ് കഞ്ചാവ് മാഫിയകള്‍ പിടിമുറുക്കിയിരിക്കുന്നത്. രാത്രിയായാല്‍ ട്രെയിന്‍ മാര്‍ഗവും അല്ലാതെയും ഈ ഭാഗങ്ങളില്‍ വന്‍തോതില്‍ കഞ്ചാവ് എത്തുന്നുണ്ടെന്നാണ് പ്രദേശവാസികള്‍ പറയുന്നത്.
തമിഴ്‌നാട്ടില്‍ നിന്നും ട്രെയിനില്‍ മാര്‍ഗം എത്തിക്കുന്ന കഞ്ചാവ്, ട്രെയിന്‍ പളളിച്ചലിനു സമീപം കോട്ടയംമുക്ക് എന്ന സ്ഥലത്തെത്തുമ്പോള്‍ പുറത്തിടുകയും അവിടെ കാത്തു നില്‍ക്കുന്ന ഏജന്റുമാര്‍ അത് ലക്ഷ്യ സ്ഥാനത്ത് എത്തിക്കുന്നുവെന്നുമാണ് വിവരം. റെയില്‍വേ സ്റ്റേഷനില്‍ ഇറക്കിയാല്‍ പൊലിസിന്റെ വലയിലാകും എന്നതിനാലാണ് ഈ വിദ്യ പ്രയോഗിക്കുന്നത്. അതേ സമയം പരാതികള്‍ ലഭിച്ചിട്ടും എക്‌സൈസ് സംഘം ഈ ഭാഗ ത്തേയ്ക്ക് തിരിഞ്ഞു നോക്കാറില്ലെന്ന് നാട്ടുകാര്‍ പറയുന്നു.