മാന്നാര്‍: തുടര്‍ച്ചയായി പെയ്ത മഴയില്‍ വെള്ളം കയറിയതിനെ തുടര്‍ന്ന് പത്ത് ഏക്കറിലെ നെല്ല് കൊയ്യാന്‍ കഴിയാതെ നശിച്ചു. അപ്പര്‍കുട്ടനാട്ടില്‍ ഉള്‍പ്പെട്ട വള്ളക്കാലി മേല്‍പ്പാടം ഒറ്റങ്കേരി പാടശേഖരത്തിലെ കൃഷിയാണ് വെള്ളം കയറി നശിച്ചത്.
സമീപ പാടശേഖരങ്ങള്‍ക്കൊപ്പം ഇവിടെ കൃഷിയിറക്കുവാന്‍ സാധിച്ചിരുന്നില്ല. താമസിച്ചാണ് ഇവിടെ കൃഷിയിറക്കിയത്. അതിനാല്‍ തന്നെ മറ്റ് പാടശേഖരങ്ങളില്‍ വിളവെടുപ്പ് നടത്തിയപ്പോള്‍ ഇവിടെ കൊയ്യാന്‍ പാകമായിരുന്നില്ല.
അതിനാല്‍ മറ്റിടങ്ങളിലെ കൊയ്ത്ത് കഴിഞ്ഞപ്പോള്‍ കൊയ്ത്ത് മെഷിന്‍ പോകുകയും ചെയ്തു. വീണ്ടും കൊയ്ത്ത് മെഷീന്‍ എത്തിക്കാന്‍ കാലതാമസം നേരിട്ടപ്പോഴേക്കും മഴയെത്തുകയും ചെയ്തു. ഇനിയും വെള്ളമിറങ്ങി കൊയ്ത്ത് മെഷീന്‍ എത്തുമ്പോഴേയ്ക്കും നെല്ല് പൂര്‍ണ്ണമായും നശിക്കുമെന്ന് കര്‍ഷകര്‍ പറയുന്നു.