ലഖ്‌നോ: ഉത്തര്‍പ്രദേശ് നിയമസഭ തരെഞ്ഞെടുപ്പിന്റെ രണ്ടാം ഘട്ടം ആരംഭിച്ചു. ഉത്തര്‍പ്രദേശില്‍ 11 ജില്ലകളിലെ 67 മണ്ഡലങ്ങളിലേക്കുള്ള തെരഞ്ഞെടുപ്പാണ് രണ്ടാം ഘട്ടത്തില്‍ നടക്കുന്നത്. ഇന്ന് രാവിലെ ഏഴു മുതല്‍ വൈകീട്ട് അഞ്ചു വരെയാണ് തെരഞ്ഞെടുപ്പ്. കനത്ത സുരക്ഷയിലാണ് തെരഞ്ഞെടുപ്പ് നടക്കുന്നത്. ഉത്തരാഖണ്ഡ് നിയമസഭ തെരഞ്ഞെടുപ്പും ഇന്നാണ് നടക്കുന്നത്. 69 സീറ്റുകളിലേക്കാണ്
ഇവിടെ തെരഞ്ഞെടുപ്പ് അങ്കം നടക്കുന്നത്.

ഒരു ഭിന്നലിംഗക്കാരനും 82 വനിതാ സ്ഥാനാര്‍ഥികളുമടക്കം 721 പേരാണ് രണ്ടാം ഘട്ടത്തില്‍ മത്സരിക്കുന്നത്. രണ്ട് കോടി 28 ലക്ഷം വോട്ടര്‍മാരാണ് ഇന്നത്തെ തെരഞ്ഞെടുപ്പില്‍ പങ്കാളികളാകുക. ഏഴു ഘട്ടങ്ങളിലായി നടക്കുന്ന തെരഞ്ഞെടുപ്പിലെ ബാക്കി അഞ്ചു മണ്ഡലങ്ങളിലേക്കുള്ള തെരഞ്ഞെടുപ്പ് പ്രചാരണം പുരോഗമിക്കുകയാണ്. ആകെ 403 സീറ്റുകളാണ് ഉത്തര്‍പ്രദേശിലുള്ളത്. ഉത്തര്‍പ്രദേശില്‍ സമാജ്‌വാദി- കോണ്‍ഗ്രസ് സഖ്യവും ബി.എസ്.പിയും തമ്മിലാണ് യഥാര്‍ഥ മത്സരം. ബി.ജെ.പിയും ഇവിടെ രംഗത്തുണ്ട്.