താമരശേരി: സുഹൃത്തുക്കളും വ്യാപാരികളുമായ നാലുപേര്‍ ചേര്‍ന്നു നടത്തിയ പച്ചക്കറികൃഷിയില്‍ നൂറുമേനി.
 വീട്ടിലേക്കുള്ള ആവശ്യത്തില്‍നിന്ന് ശേഷിച്ചവ സുഹൃത്തുക്കള്‍ക്കും അയല്‍വാസികള്‍ക്കും സൗജന്യമായി നല്‍കി സംഘം മാതൃകയായി.
വിഷരഹിത പച്ചക്കറി കൃഷിയിലേക്കു കൂടുതല്‍പേര്‍ കടന്നുവരുന്നതിനു പ്രചോദനം നല്‍കുന്നതിന്റെ ഭാഗമായാണ് ഇത്തവണ വില്‍പ്പന വേണ്ടെന്നു വച്ചതെന്ന് സംഘാംഗങ്ങള്‍ പറഞ്ഞു.
പൂനൂരിലെ വ്യാപാരികളായ  കക്കാട്ടുമ്മല്‍ മജീദ്, ഏഴുവളപ്പില്‍ നാസര്‍, സലാം, പൂവന്‍കണ്ടി ഷമീര്‍ എന്നിവര്‍ ചേര്‍ന്നാണ് പെരിങ്ങളംവയലിലെ 25 സെന്റ് തരിശുനിലത്തില്‍ കൃഷിയിറക്കിയത്.
കക്കിരി, വെണ്ട, മത്തന്‍, പടവലം, ചീര എന്നിവയാണ് കൃഷി ചെയ്തത്. ഒരാഴ്ചയായി തുടങ്ങിയ വിളവെടുപ്പില്‍ രണ്ട് ക്വിന്റല്‍ കക്കിരി മാത്രം വിളവെടുത്തു. പൂര്‍ണമായും ജൈവവളം ഉപയോഗിച്ചാണ് കൃഷി ചെയ്തത്.