പുത്തനത്താണി: ജില്ലയില്‍ 1357 എല്‍.പി സ്‌കൂളുകളിലായി 85,000 ത്തോളം കുട്ടികള്‍ക്ക് നാളെ പ്രവേശനോത്സവം. പ്രചരണ ജാഥ, ഘോഷയാത്രകള്‍, പഠനോപകരണ വിതരണം, സൗജന്യ യൂനിഫോം വിതരണം തുടങ്ങിയവ എല്ലാ വിദ്യാലയങ്ങളിലും നടക്കും. ജില്ലാതല സ്‌കൂള്‍ പ്രവേശനോത്സവം കല്‍പകഞ്ചേരി ജി.എല്‍.പി സ്‌കൂളില്‍ നാളെ മന്ത്രി ഡോ. കെ.ടി ജലീല്‍ ഉദ്ഘാടനം ചെയ്യും. നിയുക്ത എം.എല്‍.എ സി. മമ്മൂട്ടി അധ്യക്ഷനാകും. ഇ.ടി മുഹമ്മദ് ബഷീര്‍ എം.പി മുഖ്യാതിഥിയാകും. നിയുക്ത എം.എല്‍.എ കെ.കെ ആബിദ് ഹുസൈന്‍ തങ്ങള്‍, ജില്ലാപഞ്ചായത്ത് പ്രസിഡന്റ്് എ.പി ഉണ്ണികൃഷ്ണന്‍ തുടങ്ങിയവര്‍ പങ്കെടുക്കും.
പുതിയ അധ്യയന വര്‍ഷത്തിന്റെ മുന്നോടിയായി എല്ലാ അധ്യാപകര്‍ക്കും അവധിക്കാല പരിശീലനവും, എല്ലാ പഞ്ചായത്തുകളിലും മുനിസിപ്പാലിറ്റികളിലും സമന്വയം-2016 അധ്യാപക സംഗമവും നടന്നു.  ഇന്ന് എല്ലാ സ്‌കൂളുകളിലും രക്ഷിതാക്കള്‍, പൊതു ജനങ്ങള്‍ എന്നിവരുടെ സഹകരണത്തോടെ ഒരുക്കം -2016 ശില്‍പശാലകളും നടക്കും. വിവിധ പ്രവര്‍ത്തനങ്ങള്‍ക്കായി സര്‍വശിക്ഷാ അഭിയാന്‍ സ്‌കൂളുകള്‍ക്ക് ഗ്രാന്‍ുകള്‍ നല്‍കുന്നു.
ഒന്നു മുതല്‍ എട്ടുവരെ എല്ലാ പെണ്‍കുട്ടികള്‍ക്കും, എസ്.സി- എസ്.ടി വിഭാഗത്തിലെ ആണ്‍കുട്ടികള്‍ക്കും ബി.പി.എല്‍ വിഭാഗത്തിലെ ആണ്‍കുട്ടികള്‍ക്കും (എ.പി.എല്‍ ആണ്‍കുട്ടികളൊഴിച്ച്) ഓരോരുത്തര്‍ക്കും നാനൂറ് രൂപ വീതം പ്രധാനധ്യാപകര്‍ക്ക് നല്‍കിയിട്ടുണ്ട്. എല്‍.പി സ്‌കൂളിന് 5000 രൂപയും യു.പി സ്‌കൂളിന് 7000 രൂപയും സ്‌കൂള്‍ ഗ്രാന്റായി നല്‍കുന്നു.
മെയിന്റിനന്‍സ് ഗ്രാന്റായി എല്ലാ സര്‍ക്കാര്‍ എല്‍.പി, യു.പി സ്‌കൂളുകള്‍ക്ക് ഏഴായിരത്തി അഞ്ഞൂറ് രൂപ വീതവും നല്‍കുന്നുണ്ട്. ഗ്രാന്റുകള്‍, യൂണിഫോം എന്നിവയുടെ ജില്ലാ തല വിതരണ ഉദ്ഘാടനവും ചടങ്ങില്‍ നടക്കും.
വാര്‍ത്താ സമ്മേളനത്തില്‍ കല്‍പകഞ്ചേരി ഗ്രാമ പഞ്ചായത്ത് പ്രസിഡന്റ് എന്‍.കുഞ്ഞാപ്പു, എസ്.എസ്.എ മലപ്പുറം ജില്ലാ പ്രോജട് ഓഫീസര്‍ ടി. മുജീബ് റഹ്മാന്‍, എസ്.എസ്.എ മലപ്പുറംജില്ലാ പ്രോഗ്രാം ഓഫീസര്‍ വി.എം ഹുസൈന്‍, പി.ആയിശാബി ടീച്ചര്‍, പി. സൈതുട്ടി എന്നിവര്‍ പങ്കെടുത്തു.