ഗുവാഹത്തി: ഇന്ത്യന്‍ സൂപ്പര്‍ ലീഗ് പോരാട്ടത്തില്‍ ഇന്ന് പൂണെ എഫ്.സി നോര്‍ത്ത് ഈസ്റ്റ് യുനൈറ്റഡ് എഫ്.സിയുമായി ഏറ്റുമുട്ടും. പൂണെയില്‍ നടന്ന ആദ്യപാദ മത്സരത്തില്‍ നോര്‍ത്ത് ഈസ്റ്റ് 5-0 ത്തിന്റെ വമ്പന്‍ പരാജയം ഏറ്റുവാങ്ങിയിരുന്നു. ഇതിനുള്ള മധുര പ്രതികാരം വീട്ടാനാവും പരിശീലകന്‍ അവ്‌റാം ഗ്രാന്റിന് കീഴില്‍ നേര്‍ത്ത് ഈസ്റ്റ് കളത്തിലിറങ്ങുന്നത്.
കഴിഞ്ഞ മത്സരത്തില്‍ ഗോവയെ 2-2 ന് സമനിലയില്‍ പിടിക്കാന്‍ സാധിച്ചതിന്റെ ആത്മവിശ്വാസത്തിലാണ് ടീം. കേരളാ ബ്ലാസ്റ്റേഴ്‌സിനോടേറ്റ അപ്രതീക്ഷിത തോല്‍വിയില്‍ നിന്ന് പൂണെ ഇതുവരെ മോചിതരായിട്ടില്ല. കളിയുടെ 93ാം മിനുട്ടിലാണ് സി.കെ വിനീത് പൂണെയുടെ പ്രതീക്ഷകള്‍ തകര്‍ത്തത്. പട്ടികയില്‍ മൂന്നാം സ്ഥാനത്താണ് പൂണെ. പേഓഫ് സാധ്യത നിലനിര്‍ത്താന്‍ പൂണെക്ക് ജയം അനിവാര്യമാണ്. പോയിന്റ് പട്ടികയില്‍ ഒന്‍പതാം സ്ഥാനത്തുള്ള നോര്‍ത്ത് ഈസ്റ്റും ജയിക്കാനുറച്ചാണ് പോരാട്ടത്തിനിറങ്ങുന്നത്.