വാട്‌ഫോര്‍ഡ്: സ്വന്തം തട്ടകത്തില്‍ ചെല്‍സിയെ ഒന്നിനെതിരേ നാലു ഗോളുകള്‍ക്ക് തകര്‍ത്തെറിഞ്ഞ് വാട്‌ഫോര്‍ഡ് എഫ്.സി.
വിക്‌റേജ് റോഡ് സ്റ്റേഡിയത്തില്‍ നടന്ന പ്രീമിയര്‍ ലീഗ് പോരാട്ടത്തില്‍ അവസാന മിനുട്ടുകളില്‍ നേടിയ ഗോളുകളിലാണ് വാട്‌ഫോര്‍ഡ് മികച്ച വിജയം നേടിയത്. വാട്‌ഫോര്‍ഡിന് വേണ്ടി ട്രോയ് ഡീനി (42, പെനാല്‍റ്റി), ഡാരില്‍ ജന്മാത്(84), ജെറാര്‍ഡ് ഡിലോഫോ (88), റോബര്‍ട്ടോ പെരേര (91) എന്നിവര്‍ വല ചലിപ്പിച്ചു. ഹസാര്‍ഡിന്റെ വകയായിരുന്നു ചെല്‍സിയുടെ ആശ്വാസ ഗോള്‍.
ചെല്‍സിയുടെ തുടര്‍ച്ചയായ രണ്ടാം തോല്‍വിയാണിത്. കഴിഞ്ഞ മത്സരത്തില്‍ ബേണ്‍മൗത്തിനോട് എതിരില്ലാത്ത മൂന്നു ഗോളുകള്‍ക്ക് പരാജയപ്പെട്ടിരുന്നു.
കളിയുടെ തുടക്കം മുതല്‍ വാട്‌ഫോര്‍ഡ് ചെല്‍സി ഗോള്‍ മുഖത്തേക്ക് നിരന്തരം ആക്രമണം നടത്തി കൊണ്ടേയിരുന്നു. 30ാം മിനുട്ടില്‍ മിഡ്ഫീല്‍ഡര്‍ ബക്കയാക്കോ റെഡ് കാര്‍ഡ് കണ്ട് പുറത്ത് പുറത്ത് പോയത് ചെല്‍സിക്ക് തിരിച്ചടിയായി. മുന്‍ ബാര്‍സലോണ താരം ഡിലോഫോയായിരുന്നു ചെല്‍സിക്ക് കടുത്ത വെല്ലുവിളി ഉയര്‍ത്തിയത്. കളിയുടെ 42ാം മിനുട്ടില്‍ പന്തുമായി ബോക്‌സിലേക്ക് ഓടിക്കയറിയ ഡിലോഫോയെ ചെല്‍സി ഗോള്‍കീപ്പര്‍ വീഴ്ത്തിയതിന് ലഭിച്ച പെനാല്‍റ്റി ട്രോയ് ടീനി വലയിലാക്കി(1-0). ആദ്യ പകുതിയില്‍ ഒരു ഗോളിന് മുന്‍പില്‍ നിന്ന വാട്‌ഫോര്‍ഡിനെ 82ാം മിനുട്ടില്‍ ഹസാര്‍ഡ് നേടിയ ഗോളില്‍ ചെല്‍സി സമനിലയില്‍ പിടിച്ചു. എന്നാല്‍ 84ാം മിനുട്ടില്‍ ജന്മാത്തിലൂടെ വീണ്ടും വാട്‌ഫോര്‍ഡ് മുമ്പിലെത്തി.
88ാം മിനുട്ടില്‍ ഡിലോഫോയും 91ാം മിനുട്ടില്‍ പെരേരയും നോടിയ ഗോളില്‍ വാട്‌ഫോര്‍ഡ് ചെല്‍സിക്ക് മേല്‍ വന്‍വിജയം സ്വന്തമാക്കി. 26 കളികളില്‍ നിന്ന് 15 ജയവും അഞ്ച് സമനിലയും ആറു തോല്‍വിയടക്കം 50 പോയിന്റുമായി പട്ടികയില്‍ നാലാം സ്ഥാനത്താണ് ചെല്‍സി. 69 പോയിന്റുമായി മാഞ്ചസ്റ്റര്‍ സിറ്റിയാണ് പട്ടികയില്‍ ഒന്നാമത്. രണ്ടാമതുള്ള മാഞ്ചസ്റ്ററിന് 56 പോയിന്റും മൂന്നാമതുള്ള ലിവര്‍പൂളിന് 51 പോയിന്‍ുമാണുള്ളത്. ജയത്തോടെ മൂന്നാം സ്ഥാനത്തേക്ക് മുന്നേറാനുള്ള സുവര്‍ണാവസരമാണ് അന്റോണിയോ കോണ്ടെയുടെ ടീം നഷ്ടപ്പെടുത്തിയത്.