മുംബൈ: അണ്ടര്‍ 19 ക്രിക്കറ്റ് ലോകകപ്പ് കീരീടം നേടിയ ഇന്ത്യന്‍ സംഘത്തിന് പ്രഖ്യാപിച്ച സമ്മാനത്തുകയില്‍ ബി.സി.സി.ഐ വിവേചനം കാണിച്ചെന്ന് രാഹുല്‍ ദ്രാവിഡ്. ടീമിന്റെ മുഖ്യ പരിശീലകനെന്ന നിലയില്‍ 50 ലക്ഷം രൂപയാണ് ബി.സി.സി.ഐ ദ്രാവിഡിന് സമ്മാനത്തുകയായി പ്രഖ്യാപിച്ചത്.
കൂടാതെ ടീമിലെ കളിക്കാര്‍ക്ക് ഓരോരുത്തര്‍ക്കുമായി 30 ലക്ഷവും സപ്പോര്‍ട്ടിങ് സ്റ്റാഫിന് 20 ലക്ഷം രൂപയും പ്രഖ്യാപിച്ചിരുന്നു. ടീം വിജയത്തില്‍ എല്ലാവരും ഒരു പോലെയാണ് പ്രവര്‍ത്തിച്ചതെന്നും തനിക്ക് മാത്രം ഇത്രയും തുക പ്രഖ്യാപിച്ചത് ശരിയല്ലെന്നും ദ്രാവിഡ് വ്യക്തമാക്കി. നിലവിലെ കണക്കനുസരിച്ച് ബൗളിങ് കോച്ച് പരാസ് മാംബ്രെയ്ക്കും ഫീല്‍ഡിങ് കോച്ച് അഭയ് ശര്‍മയ്ക്കും 20 ലക്ഷം രൂപ മാത്രമേ ലഭിക്കൂ.
തനിക്ക് നല്‍കിയ 50 ലക്ഷം രൂപ തന്നെ മറ്റുള്ള സപ്പോര്‍ട്ടിങ് സ്റ്റാഫിനും നല്‍കണമെന്ന നിലപാടിലാണ് അദ്ദേഹം. അതേസമയം താരങ്ങള്‍ക്കു ലഭിക്കുന്നതിനേക്കാള്‍ ഉയര്‍ന്ന തുക പരിശീലകന് നല്‍കുന്നതും ആദ്യത്തെ സംഭവമാണ്.