ബെയ്ജിങ്: വത്തിക്കാനുമായി നയതന്ത്രബന്ധം സ്ഥാപിക്കുമെന്ന് ചൈന. ചൈനയുടെ ഔദ്യോഗിക ദിനപ്പത്രമാണ് ഇക്കാര്യം പുറത്തുവിട്ടത്. ഫ്രാന്‍സിസ് മാര്‍പാപ്പ ആണ് പ്രശ്‌നപരിഹാരത്തിനായി മുന്നില്‍ നില്‍ക്കുന്നത്.
കടുത്ത അഭിപ്രായഭിന്നതകളെ തുടര്‍ന്ന് 1951ലാണ് വത്തിക്കാനുമായുള്ള നയതന്ത്രബന്ധം ചൈന വിച്ഛേദിച്ചത്. ഇതിനുശേഷം ചൈനയിലെ കത്തോലിക്കാ സ്ഥാപനങ്ങള്‍ നിയന്ത്രിക്കുന്നത് ചൈനീസ് കാത്തലിക് പാട്രിയോട്ടിക് അസോസിയേഷനാണ്. അസോസിയേഷന് അധികാരം നല്‍കിയതിനെച്ചൊല്ലി ചൈന-വത്തിക്കാന്‍ തര്‍ക്കവും നിലനില്‍ക്കുന്നുണ്ട്. മാര്‍പാപ്പയുടെ അനുവാദമില്ലാതെ ചൈനയിലെ തദ്ദേശീയ കത്തോലിക്കാസഭ വാഴിച്ച ബിഷപ്പിനെ റോമന്‍ കത്തോലിക്കാ സഭ റദ്ദാക്കിയ സംഭവവും ഉണ്ടായിട്ടുണ്ട്. ഈ വിരോധങ്ങള്‍ക്കൊക്കെയാണ് ഇതോടെ അവസാനമാകുന്നത്.
സ്ഥാനമേറ്റതു മുതല്‍ ചൈനയുമായുള്ള നയതന്ത്ര ബന്ധം പുനഃസ്ഥാപിക്കാമന്‍ മാര്‍പാപ്പ ശ്രമിച്ചിരുന്നു. 2014ല്‍ മാര്‍പാപ്പയുടെ ദക്ഷിണകൊറിയന്‍ സന്ദര്‍ശനവേളയില്‍ ചൈനയുടെ ആകാശത്തുകൂടി കടന്നുപോകാന്‍ അനുവാദം നല്‍കി ചൈനയും പ്രശ്‌നപരിഹാരത്തിനു തയാറായിരുന്നു.