റിയാദ്: സഊദിയില്‍ പ്രവാസം അവസാനിക്കാറായെന്ന വാര്‍ത്തകള്‍ക്ക് അടിസ്ഥാനമില്ലെന്ന് കണക്കുകള്‍. ഇക്കൊല്ലം പകുതിയോടെ നാലര ലക്ഷം വിദേശികള്‍ ഒഴുകിയെത്തുമെന്നാണ് കണക്കുകള്‍.

സാമ്പത്തിക പരിഷ്‌കരണങ്ങള്‍ക്കിടയിലും വിദേശ തൊഴിലാളികള്‍ എത്തുന്നതായാണ് കണക്കുകള്‍ വ്യക്ത്തമാക്കുന്നത്. പ്രാദേശിക മാധ്യമമാണ് കണക്കുകള്‍ സഹിതം വാര്‍ത്ത പുറത്തുവിട്ടത്.

2018 മധ്യത്തില്‍ നാലര ലക്ഷത്തിലേറെ വിദേശികള്‍ (459,749 പേര്‍) പുതുതായി സഊദിയിലെത്തുമെന്ന് ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് പുറത്തിറക്കിയ റിപ്പോര്‍ട്ട് പ്രതീക്ഷിക്കുന്നു. കഴിഞ്ഞവര്‍ഷം പകുതിയില്‍ രാജ്യത്തുള്ള വിദേശികളുടെ എണ്ണം 12,185,284 ആയിരുന്നു. ഇത് 3.8 ശതമാനം എന്ന തോതില്‍ വര്‍ധിച്ച് 12,645,033 ആയി ഉയരുമെന്നാണ് അതോറിറ്റി ഏറ്റവുമൊടുവില്‍ പുറത്തുവിട്ട റിപ്പോര്‍ട്ട്.

എണ്ണയുഗത്തിന് ശേഷം ദേശീയ വരുമാന സ്രോതസ്സ് വിപുലീകരിക്കുന്നതിന് ആവിഷ്‌കരിച്ച 'വിഷന്‍ 2030' സാക്ഷാത്കൃതമാകുന്നതിന് നടപ്പാക്കുന്ന പദ്ധതികളിലേക്ക് ലോകത്തെമ്പാടുമുള്ള വിദഗ്ധ, അവിദഗ്ധ തൊഴിലാളികളുടെ സേവനം ആവശ്യമായി വരുമെന്ന് സൗദി ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് റിപ്പോര്‍ട്ട് വ്യക്തമാക്കുന്നു

നിരവധി തൊഴില്‍ മേഖലകളില്‍ സമ്പൂര്‍ണ സ്വദേശിവത്കരണം നടപ്പാക്കിയതിന്റെയും ആശ്രിത ലെവി, വാറ്റ് തുടങ്ങിയ സാമ്പത്തിക പരിഷ്‌കരണങ്ങള്‍ ഏര്‍പ്പെടുത്തിയതിന്റേയും പശ്ചാത്തലത്തില്‍ വിദേശികള്‍ സഊദിയിലെ പ്രവാസം അവസാനിപ്പിക്കുമെന്ന സൂചനകള്‍ക്കിടെയാണ് ഈ വാര്‍ത്ത.

കഴിഞ്ഞ വര്‍ഷം അവസാനപാദത്തില്‍ സഊദിയില്‍ പ്രവാസം അവസാനിപ്പിച്ച് 189,015 വിദേശതൊഴിലാളികളാണ് മടങ്ങിയത്. 2016 അവസാനത്തില്‍ 10,883,335 വിദേശികള്‍ ഉണ്ടായിരുന്നിടത്ത് 2017 ഇതേ കാലയളവില്‍ 10,694,320 ആയി കുറഞ്ഞെന്നും റിപ്പോര്‍ട്ടിലുണ്ട്. ഒമ്പത് മാസത്തിനിടക്കാണ് ഇത്രയും വിദേശികള്‍ സൗദി വിട്ടത്.

എന്നാല്‍ ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്‍ഷുറന്‍സ് (ഗോസി) പുറത്തിറക്കിയ റിപ്പോര്‍ട്ടില്‍ 2017 അവസാനിക്കുമ്പോള്‍ വിദേശ തൊഴിലാളികളുടെ എണ്ണത്തില്‍ വന്ന കുറവ് ഇതിലും കൂടുതലാണ്. 2016 അവസാനിക്കുമ്പോള്‍ ഗോസിയില്‍ രജിസ്റ്റര്‍ ചെയ്ത തൊഴിലാളികള്‍ 8,492,965 ഉണ്ടായിരുന്നിടത്ത് കഴിഞ്ഞ വര്‍ഷാവസാനം 8,186,367 ആയി കുറഞ്ഞു. അതായത് സഊദി തൊഴില്‍മേഖലയില്‍ ഒമ്പത് മാസത്തിനിടെ കൊഴിഞ്ഞുപോയ വിദേശികളുടെ എണ്ണം 306,598. അതേസമയം, സഊദി ജനസംഖ്യയില്‍ ഈ വര്‍ഷം 1.7 ശതമാനം മാത്രമുള്ള വര്‍ധനയാണ് അതോറിറ്റി പ്രതീക്ഷിക്കുന്നത്. 2017ന്റെ മധ്യത്തില്‍ സ്വദേശികളുടെ എണ്ണം 20,427,357 ആയിരുന്ന സ്ഥാനത്ത് 20,768,627 ആയി മാറുമെന്നാണ് നിഗമനം.