റിയാദ്: ഇറാന്‍ പൗരന്മാരെ ഹജ്ജിന് അയക്കാനുള്ള സഊദി കരാറില്‍ ഒപ്പുവക്കണമെങ്കില്‍ മിന ദുന്തത്തില്‍ മരിച്ച ഇറാന്‍ പൗരന്മാര്‍ക്ക് ദിയ പണം (ബ്ലഡ് മണി) നല്‍കാന്‍ സഊദി സര്‍ക്കാര്‍ തയാറാകണെമന്ന് ഇറാന്‍ ആവശ്യപ്പെട്ടു. ഇറാന്‍ ഇസ്‌ലാമിക് ആന്‍ഡ് കള്‍ച്ചറല്‍ മന്ത്രി റിസ സാലിഹ് അമീരി നടത്തിയ വാര്‍ത്താ സമ്മേളനത്തിലാണ് ഇക്കാര്യം ഉന്നയിച്ചത്. ഹജ്ജിനെത്തുന്ന ഇറാന്‍ പൗരന്മാരുടെ സുരക്ഷയും അന്തസ്സും ഇറാന്‍ ഭരണകൂടത്തിന്റെ ഉത്തരവാദിത്വമാണെന്നും ഇദ്ദേഹം പറഞ്ഞു.
ഹജ്ജ് കരാര്‍ ഒപ്പുവക്കാന്‍ ഇറാന് സഊദിയുടെ ഔദ്യോഗിക ക്ഷണം ലഭിച്ചിട്ടുണ്ടണ്ട്. ഫെബ്രുവരി 23 ന് ഇറാന്‍ സംഘം സന്ധി സംഭാഷണത്തിനായി സഊദിയിലേക്ക് യാത്ര തിരിക്കും. 2015 ല്‍ നടന്ന മിന ദുരന്തത്തില്‍ മരിച്ചവരില്‍ നൂറു കണക്കിന് ഇറാന്‍ പൗരന്മാര്‍ ഉണ്ടണ്ടായിരുന്നു. സഊദിയുമായി കടുത്ത അഭിപ്രായ വ്യത്യാസം നിലനില്‍ക്കെയാണ് ഇറാന്‍ തങ്ങളുടെ പൗരന്മാരെ ഹജ്ജിനു അയക്കുന്നതില്‍ നിന്നും വിലക്കേര്‍പ്പെടുത്തിയത്.
ഹജ്ജ് കരാറില്‍ ഒപ്പു വെക്കാനായി കഴിഞ്ഞ വര്‍ഷം വിവിധ ഘട്ടങ്ങളിലായി സഊദി , ഇറാനെ ചര്‍ച്ചക്ക് ക്ഷണിച്ചിരുന്നു. എന്നാല്‍ ചര്‍ച്ചകളില്‍ അംഗീകരിക്കാന്‍ കഴിയാത്ത ആവശ്യങ്ങള്‍ പറഞ്ഞു ഇറാന്‍ മടങ്ങുകയായിരുന്നു. ഇതേ തുടര്‍ന്ന് വിരലിലെണ്ണാവുന്ന ഇറാന്‍ പൗരന്മാര്‍ വിവിധ രാജ്യങ്ങള്‍ വഴിയാണ് ഹജ്ജിനെത്തിയത്. 2015ല്‍ നടന്ന ദുരന്തത്തില്‍ 770 ഹാജിമാരാണ് മരിച്ചതെന്നാണ് സഊദി അധികൃതര്‍ വ്യക്തമാക്കിയത്. എന്നാല്‍ 7000 ഹാജിമാര്‍ മരിച്ചെന്നും ഇതില്‍ 460 ആളുകള്‍ തങ്ങളുടെ പൗരന്മാരാണെന്നുമാണ് ഇറാന്‍ അധികൃതരുടെ വാദം.