പാറക്കടവ്: ചെക്യാട് പഞ്ചായത്തിലെ ബി.എസ്.എഫ് കേന്ദ്രത്തില്‍ ശുചീകരണ പ്രവൃത്തികളില്‍ പങ്കാളികളായി കുട്ടി പൊലിസുകാരെത്തി. ഉമ്മത്തൂര്‍ എസ്.ഐ ഹയര്‍ സെക്കന്‍ഡറി സ്‌കൂളിലെ സ്റ്റുഡന്റ് പൊലിസിലെ മുപ്പത് കാഡറ്റുകളാണ് ബി.എസ്.എഫ് കേന്ദ്രത്തിലെത്തിയത്. ബി.എസ്.എഫ് കേന്ദ്രത്തില്‍ ഇന്ന് സൗത്ത് ഐ.ജി സന്ദര്‍ശനം നടത്തുന്നതിന്റെ ഭാഗമായി നടത്തിയ ശുചീകരണ പ്രവര്‍ത്തനത്തിലാണ് ജവാന്മാരോടൊപ്പം കുട്ടിപ്പൊലിസുകാരും പങ്ക് ചേര്‍ന്നത്. ഇവിടെയെത്തിയ കാഡറ്റുകളെ ഇന്‍സ്‌പെക്ടര്‍ സലീം, സബ് ഇന്‍സ്‌പെക്ടര്‍ രാജേന്ദ്രന്‍ നായര്‍ എന്നിവര്‍ ചേര്‍ന്ന് സ്വീകരിച്ചു. പി.ടി.എ പ്രസിഡന്റ് കെ.പി കുമാരന്‍, കമ്മ്യൂണിറ്റി പൊലിസ് ഓഫിസര്‍ പി.പി അബ്ദുല്‍ ഹമീദ്, സി.പി.ഒമാരായ അബ്ദുല്‍ സലാം, സുബിത, ദീപ എന്നിവര്‍ നേതൃത്വം നല്‍കി.