വടകര: വടകരയെപ്പറ്റിയുള്ള എല്ലാ കാര്യങ്ങളും അറിയാന്‍ പുതിയ മൊബൈല്‍ ആപ്ലിക്കേഷനുമായി ഐ.ടി മേഖലയിലെ യുവ എന്‍ജിനീയര്‍. 24 വര്‍ഷത്തോളമായി ഗള്‍ഫില്‍ ഇലക്‌ട്രോണിക്‌സ് വിദഗ്ധനായ അടക്കാത്തെരുവിലെ കാനപ്പള്ളി മുഹമ്മദ് അന്‍വര്‍ ആണ് വടകരക്കാര്‍ക്ക് ആവശ്യമായ മുഴുവന്‍ വിവരങ്ങളുമടങ്ങിയ ആപ്പ് തയാറാക്കിയത്.
മര്‍ച്ചന്റ്‌സ് അസോസിയേഷന്‍ ഹാളില്‍ ഇന്ന് വൈകിട്ട് നാലിന് നടക്കുന്ന ചടങ്ങില്‍ നഗരസഭ ചെയര്‍മാന്‍ കെ. ശ്രീധരന്‍ ആപ്ലിക്കേഷന്‍ ലോഞ്ചിങ് നിര്‍വഹിക്കും. എന്റെ വടകര മൊബൈല്‍ അപ്ലിക്കേഷന്‍ എല്ലാ ആന്‍ഡ്രോയ്ഡ് ഫോണിലും ലഭിക്കും.
ഓട്ടോറിക്ഷ ലഭിക്കാനും തെങ്ങുകയറ്റക്കാരനെ കിട്ടാനും ഡോക്ടര്‍മാരെപ്പറ്റി അറിയാനും എന്നു വേണ്ട എല്ലാ കാര്യങ്ങളും പുതിയ ആപ്ലിക്കേഷന്‍ വഴി ലഭിക്കുമെന്ന് അന്‍വര്‍, കെ.എം ബാലകൃഷ്ണന്‍, മലയില്‍ മധുസൂദനന്‍, എന്‍.കെ. ശ്രീധരന്‍ എന്നിവര്‍ വാര്‍ത്താസമ്മേളനത്തില്‍ പറഞ്ഞു.