മലപ്പുറം: സംസ്ഥാനത്തെ മികച്ച ജില്ലാപഞ്ചായത്ത് സെക്രട്ടറിമാരായി മലപ്പുറം ജില്ലാപഞ്ചായത്ത് മുന്‍ സെക്രട്ടറി എ. അബ്ദുല്‍ ലത്തീഫിനെയും കൊല്ലം ജില്ലാപഞ്ചായത്ത് സെക്രട്ടറി അനില്‍ കുമാറിനെയും സംസ്ഥാന സര്‍ക്കാര്‍ തെരഞ്ഞെടുത്തു. 2015-16 വര്‍ഷത്തെ പ്രവര്‍ത്തനം വിലയിരുത്തിയാണ് അവാര്‍ഡ്. 19ന് കണ്ണൂരില്‍ നടക്കുന്ന പഞ്ചായത്ത് ദിനാഘോഷത്തില്‍ അവാര്‍ഡുകള്‍ വിതരണം ചെയ്യും.
കഴിഞ്ഞ വര്‍ഷവും മികച്ച ജില്ലാപഞ്ചായത്ത് സെക്രട്ടറിക്കുള്ള അവാര്‍ഡ് എ. അബ്ദുല്‍ ലത്തീഫിന് ലഭിച്ചിരുന്നു. മലപ്പുറം ജില്ലാപഞ്ചായത്തിന് തുടര്‍ച്ചയായി മൂന്നു വര്‍ഷം ഏറ്റവും നല്ല രണ്ടാമത്തെ ജില്ലാപഞ്ചായത്തിനുള്ള സ്വരാജ് ട്രോഫി ലഭിക്കുന്നതില്‍ മുഖ്യ പങ്കുവഹിച്ചത് സെക്രട്ടറിയായിരുന്ന എ. അബ്ദുല്‍ ലത്തീഫായിരുന്നു. 2012 മുതല്‍ 2016 ഒക്‌ടോബര്‍വരെ ജില്ലാപഞ്ചായത്ത് സെക്രട്ടറിയായിരുന്നു. തിരുവനന്തപുരം അഡ്മിനിസ്‌ട്രേറ്റീവ് സെക്രട്ടേറിയറ്റില്‍ അഡീഷണല്‍ സെക്രട്ടറിയായ അദ്ദേഹം ഇപ്പോള്‍ തൃശൂരിലുള്ള ജലസേചന വകുപ്പിന്റെ കമാന്റ് ഏരിയ ഡെവലപ്‌മെന്റ് അതോറിറ്റി (കാഡ) യില്‍ അഡ്മിനിസ്‌ട്രേറ്റീവ് ഓഫിസറാണ്. മാറഞ്ചേരി സ്വദേശിയാണ്.