കൊച്ചി: കേരള ചിത്രകലാ പരിഷത്തിന്റെ സ്ഥാപക അധ്യക്ഷനായിരുന്ന പി.ടി. ഭാസ്‌കരപ്പണിക്കരുടെ സ്മരണാര്‍ഥം നല്‍കുന്ന ചിത്രകലാ പുരസ്‌കാരത്തിന് കെ. ദാമോദരന്‍ അര്‍ഹനായി. സോഷ്യല്‍ ആക്ഷന്‍ ഗ്രൂപ്പ് ഫോര്‍ സയന്‍സ്, ടെക്‌നോളജി ആന്‍ഡ് ഹ്യൂമാനിറ്റി ഇന്‍ റൂറല്‍ ഏരിയാസ് (ശാസ്ത്ര) എന്നീ സംഘടനകളും പി.ടി.ബി ട്രസ്റ്റും ചേര്‍ന്നാണ് അവാര്‍ഡ് ഏര്‍പ്പെടുത്തിയത്. ടി.കലാധരന്‍, കെ.സി. ചിത്രഭാനു, വി.ആര്‍.വി. ഏഴോം എന്നിവരടങ്ങുന്ന ജൂറിയാണു കെ. ദാമോദരനെ പുരസ്‌കാരത്തിനായി തെരഞ്ഞെടുത്തത്. പതിനായിരം രൂപയും ശില്‍പവും പ്രശസ്തിപത്രവും അടങ്ങുന്ന പുരസ്‌കാരം 15ന് എറണാകുളത്ത് നടക്കുന്ന ചടങ്ങില്‍ പ്രൊഫ. എം.കെ. സാനു സമ്മാനിക്കും.