ന്യൂഡല്‍ഹി: ബൈക്ക് യാത്രക്കാരനായ യുവാവിന്റെ ജീവനെടുത്തത് പൊലിസിന്റെ അനാസ്ഥ കാരണമെന്ന് കണ്ടെത്തി ഏഴുപേരെ സര്‍വിസില്‍ നിന്ന് സസ്‌പെന്‍ഡ് ചെയ്തു. ഡല്‍ഹിയിലെ നേതാജി സുഭാഷ് പാലസിനടുത്ത റോഡില്‍ ബുധനാഴ്ച രാത്രി പൊലിസ് ഉയര്‍ത്തിയ ബാരിക്കേഡുകള്‍ തമ്മില്‍ ബന്ധിപ്പിച്ച് വലിച്ചുകെട്ടിയ കമ്പിയില്‍ കഴുത്തുകുടുങ്ങിയാണ് 21 കാരനായ യുവാവ് മരിച്ചത്. കമ്പിയില്‍ തട്ടി ഇയാളുടെ കഴുത്ത് വേര്‍പെട്ടുപോയി. റോഡിന് കുറുകെ വച്ച രണ്ട് ബാരിക്കേഡുകളെ തമ്മില്‍ ബന്ധിപ്പിച്ച് വലിച്ചുകെട്ടിയ കമ്പിയാണ് യുവാവിന്റെ ജീവനെടുത്തതെന്ന് നാട്ടുകാര്‍ ആരോപിച്ചു. രാത്രിയിലായതുകൊണ്ട് കമ്പി വലിച്ചുകെട്ടിയത് കാണാനായില്ല.
അപകടത്തില്‍ പെട്ട യുവാവിനെ രക്ഷിക്കാനും ഇവിടെ പൊലിസുണ്ടായിരുന്നില്ല. ഓടിക്കൂടിയ നാട്ടുകാരാണ് ആശുപത്രിയിലെത്തിച്ചത്. സംഭവത്തെക്കുറിച്ച് അന്വേഷണം നടത്തണമെന്ന് മരിച്ച യുവാവിന്റെ മാതാവ് ആവശ്യപ്പെട്ടു.