കണ്ണൂര്‍ സര്‍വകലാശാല കലോത്സവം തുടങ്ങിയതു മുതല്‍ തുടര്‍ച്ചയായ അഞ്ചുവര്‍ഷം മത്സരാര്‍ഥിയായിരുന്ന പ്രശസ്ത കഥാകൃത്തും തിരക്കഥാകൃത്തുമായ പി.വി ഷാജികുമാര്‍ ഈ കലോത്സവത്തില്‍ മുഖ്യാതിഥിയായെത്തി. 1999 മുതല്‍ 2003 വരെയുള്ള വര്‍ഷങ്ങളില്‍ കഥ, കവിത, ഉപന്യാസരചന, സിനിമാനിരൂപണം, തിരക്കഥാരചന തുടങ്ങിയ മത്സരങ്ങളിലെല്ലാം ഷാജികുമാര്‍ വിജയിച്ചിരുന്നു. എഴുത്തുകാരനെ തേടിവരുന്ന കഥാപാത്രത്തെക്കുറിച്ചെഴുതിയ തവള എന്ന കഥയ്ക്ക് ആദ്യവര്‍ഷം തന്നെ ഒന്നാം സ്ഥാനവും ലഭിച്ചു. കലോത്സവങ്ങളാണു തന്നിലെ എഴുത്തുകാരനെ രൂപപ്പെടുത്തിയെടുത്തതെന്നു ഷാജി പറഞ്ഞു. താന്‍ എം.സി.എയ്ക്കു പഠിച്ച കോളജില്‍ തന്നെ മുഖ്യാതിഥിയായെത്താന്‍ കഴിഞ്ഞതില്‍ സന്തോഷമുണ്ടെന്നും ഷാജി സൂചിപ്പിച്ചു. മലയാളം കഥാരചന, കവിതാരചന എന്നിവയുടെ വിധികര്‍ത്താവ് കൂടിയായിരുന്നു ഷാജികുമാര്‍.