കണ്ണൂര്‍: മുഖ്യമന്ത്രി വിളിച്ചു ചേര്‍ത്ത സര്‍വവകക്ഷി സമാധാന യോഗതീരുമാനങ്ങളുടെ മഷിയുണങ്ങുന്നതിനു മുന്‍പുതന്നെ തലശേരി താലൂക്കില്‍ അക്രമം. പൊന്ന്യത്ത് ബി.ജെ.പി പ്രാദേശിക നേതാവിന്റെ വീടിനു നേരേ ഒരുസംഘം ആളുകള്‍ ബോംബെറിഞ്ഞു. പൊന്ന്യം കുണ്ടുംചിറയിലെ നളിനാക്ഷന്റെ വീടിനു നേരെയാണ് ബോംബേറുണ്ടായത്.
അക്രമത്തില്‍ വീടിനു സാരമായി കേടുപറ്റി. ഇതുകൂടാതെ ചെറുവാഞ്ചേരിയില്‍ ബി.ജെ. പി പ്രവര്‍ത്തകന്‍ വാസുവിന്റെ വീടിനു മുന്‍പില്‍ റീത്തും പ്രത്യക്ഷപ്പെട്ടു. അക്രമത്തിനു പിന്നില്‍ സി.പി.എം പ്രവര്‍ത്തകരാണെന്നു ബി.ജെ.പി ആരോപിച്ചു. ജില്ലയില്‍ സമാധാനയോഗങ്ങള്‍ ഊര്‍ജിതമായി നടക്കവെയാണ് വീണ്ടും അക്രമം പൊട്ടിപ്പുറപ്പെട്ടത്. ഇതു മുഖ്യമന്ത്രി പിണറായി വിജയന്‍ വിളിച്ചു ചേര്‍ത്ത സമാധാനശ്രമങ്ങള്‍ക്കു തിരിച്ചടിയായി.
കണ്ണൂരില്‍ ശാശ്വത സമാധാനം നിലനിര്‍ത്താന്‍ സി.പി.എം, ബി.ജെ.പി പാര്‍ട്ടി നേതാക്കള്‍ നടത്തിവരുന്ന ശ്രമങ്ങള്‍ അണികള്‍ സ്വീകരിച്ചില്ലെന്നാണ് സൂചന. ഇന്നലെ അക്രമം നടന്ന പൊന്ന്യം കുണ്ടുംചിറ സി. പി.എമ്മിന് സ്വാധീനമുള്ള കേന്ദ്രമാണ്. സി.പി.എം ജില്ലാസെക്രട്ടറി പി ജയരാജന്റെ നാടായ കതിരൂര്‍ പഞ്ചായത്തിലാണിത്. ജില്ലയില്‍ ശാശ്വതസമാധാനം സ്ഥാപിക്കുന്നതിനായി അണ്ടലൂരില്‍ കൊല്ലപ്പെട്ട ആര്‍.എസ്.എസ് പ്രവര്‍ത്തകന്റെ വീടു സന്ദര്‍ശിച്ചവരില്‍ ജയരാജനുമുണ്ടായിരുന്നു. സമാധാനശ്രമങ്ങള്‍ അണികളിലെത്തിക്കുന്നതിന്റെ ഉത്തരവാദിത്വം ഏറ്റെടുത്ത നേതാക്കളുടെ സ്വാധീന പ്രദേശങ്ങളില്‍ വീണ്ടും അക്രമം പൊട്ടിപ്പുറപ്പെടുന്നത് സമാധാനപ്രേമികളില്‍ നിരാശ പടര്‍ത്തിയിരിക്കുകയാണ്.