നെടുങ്കണ്ടം: നെടുങ്കണ്ടത്തിന് സമീപം കുന്നുകുഴിയില്‍ മകളെയും ഭാര്യാ മാതാവിനെയും തീവച്ച് കൊലപ്പെടുത്താന്‍ ശ്രമം. കുന്നുകുഴി ചരുവിള പുത്തന്‍വീട്ടില്‍ ശാന്തയുടെ വീടിനാണ് തീയിട്ടത്. ശാന്തയുടെ മകളുടെ ഭര്‍ത്താവ് ഹരിദാസിനെ പൊലിസ് അറസ്റ്റ് ചെയ്തു. തീപ്പിടുത്തത്തില്‍ വീട്ടുപകരണങ്ങളും വസ്ത്രങ്ങളും കത്തിനശിച്ചു. ഇന്നലെ ഉച്ചയോടെയാണ് സംഭവം. മദ്യലഹരിയില്‍ ഹരിദാസ് സ്ഥിരമായി വീട്ടിലെത്തി പ്രശ്‌നമുണ്ടാക്കുമെന്ന് നാട്ടുകാര്‍ പറഞ്ഞു. ഇന്നലെ മദ്യലഹരിയില്‍ വീട്ടിലെത്തിയ ഹരിദാസ് വീടിനു തീയിടുകയായിരുന്നു. തുടര്‍ന്ന് പ്രദേശവാസികളെത്തി ഹരിദാസിനെ പിടികൂടി നെടുങ്കണ്ടം പൊലിസിനെ വിളിച്ചുവരുത്തി കൈമാറുകയായിരുന്നു. 25000 രൂപയുടെ നാശനഷ്ടം കണക്കാക്കുന്നു.