കണ്ണൂര്‍: സഹനത്തിലൂടെ സമരസജ്ജരായി എല്ലാം സമൂഹത്തിന് സമര്‍പ്പിക്കാന്‍ റമദാനില്‍ പ്രത്യേക തയാറെടുപ്പ് അനിവാര്യമാണെന്ന് സമസ്ത എംപ്ലോയീസ് യൂനിയന്‍ സംസ്ഥാന സെക്രട്ടറി പി.ടി മുഹമ്മദ് മാസ്റ്റര്‍. കണ്ണൂര്‍ റയ്യാന്‍ നഗറില്‍ ജില്ലാ ജംഇയ്യത്തുല്‍ മുഅല്ലിമിന്‍ സംഘടിപ്പിച്ച പ്രീ റമദാന്‍ കോണ്‍ഫറന്‍സ് ഉദ്ഘാടനം ചെയ്യുകയായിരുന്നു അദ്ദേഹം. റമദാന്‍ നല്‍കുന്ന സന്ദേശവും ഔന്നത്യവും ഉയര്‍ത്തിപ്പിടിക്കാന്‍ എല്ലാവരും മുന്നോട്ടുവരണമെന്നും അദ്ദേഹം പറഞ്ഞു. മാണിയൂര്‍ അബ്ദുറഹ്മാന്‍ ഫൈസി അധ്യക്ഷനായി. റെയിഞ്ച് ഉപഹാരങ്ങള്‍ ശരീഫ് ബാഖവി സമ്മാനിച്ചു. അബ്ദുസ്സമദ് മുട്ടം പദ്ധതി സമര്‍പ്പിച്ചു. ആര്‍ അബ്ദുല്ല ഹാജി, ജുനൈദ് ചാലാട്, കെ.സി മൊയ്തുമൗലവി, സി.കെ മുഹമ്മദ് മുസ്‌ലിയാര്‍, മുസ്തഫ കൊട്ടില, ഇബ്രാഹിം ഫൈസി ചമ്പാട്, സിദ്ദീഖ് ചാലാട്, നവാസ് ദാരിമി, കരീം ഖാസിമി പ്രസംഗിച്ചു. അബ്ദുസ്സലാം ഇരിക്കൂര്‍ സ്വാഗതവും ലത്തീഫ് എടവച്ചാല്‍ നന്ദിയും പറഞ്ഞു.