ജംഷഡ്പൂര്‍: ഇന്ത്യന്‍ സൂപ്പര്‍ ലീഗ് ഫുട്‌ബോളില്‍ ഇന്ന് ആതിഥേയരായ ജംഷഡ്പൂര്‍ എഫ്.സി കന്നി സീസണില്‍ തന്നെ ആദ്യ നാല് സ്ഥാനങ്ങളില്‍ നിലയുറപ്പിക്കാനുള്ള ആവേശവുമായി നോര്‍ത്ത്ഈസ്റ്റ് യുനൈറ്റഡിനെ നേരിടും. ഹോം ഗ്രൗണ്ടിലെ കഴിഞ്ഞ രണ്ട് മത്സരങ്ങളില്‍ കേരള ബ്ലാസ്റ്റേഴ്‌സിനെ 2-1നും ഡല്‍ഹി ഡൈനാമോസിനെ 3-1നും ജംഷഡ്പൂര്‍ തോല്‍പ്പിച്ചിരുന്നു. കഴിഞ്ഞ കളിയില്‍ മുംബൈക്കെതിരായ എവേ മത്സരത്തിലും 2-1ന്റെ വിജയക്കൊടി നാട്ടി ആത്മവിശ്വാസത്തോടെയാണ് കോപ്പലാശാന്റെ കുട്ടികള്‍ നാട്ടില്‍ കളിക്കാനിറങ്ങുന്നത്.
ജംഷഡ്പൂര്‍ ഇതിനകം 14 മത്സരങ്ങള്‍ പിന്നിട്ടു. ആറ് ജയവും നാല് സമനിലയും നാല് തോല്‍വിയുമായി 22 പോയിന്റാണ് അവര്‍ക്ക്. ഇനിയുള്ള മത്സരങ്ങള്‍ ജംഷഡ്പൂരിന് നിര്‍ണായകമാണ്. മറ്റു ടീമുകള്‍ മറികടന്ന് പോകാതിരിക്കാന്‍ ജയിച്ചേ തീരൂ.
മറുവശത്ത് നോര്‍ത്ത്ഈസ്റ്റ് കഴിഞ്ഞ അഞ്ച് മത്സരങ്ങളില്‍ ചെന്നൈയിന്‍ എഫ്.സിയെ 3ൃ-1ന് അട്ടിമറിച്ചതിന് ശേഷം കഴിഞ്ഞ മൂന്ന് മത്സരങ്ങളില്‍ നോര്‍ത്ത്ഈസ്റ്റിന് ജയിക്കാന്‍ കഴിഞ്ഞിട്ടില്ല. മത്സരങ്ങള്‍ ഹൈലാന്‍ഡേഴ്‌സിന്റ വഴിയില്‍ അല്ലെങ്കിലും പുതിയ കോച്ച് അവ്‌റാം ഗ്രാന്റ് ചുമതല എറ്റെടുത്ത ശേഷം ടീമിന്റെ പ്രകടനത്തില്‍ മൊത്തത്തില്‍ ഉണര്‍വ് വന്നിട്ടുണ്ട്. ടീമിലെ ചിലരുടെ പരുക്കാണ് ഹൈലാന്‍ഡേഴ്‌സിന് തലവേദന സൃഷ്ടിക്കുന്നത്.
സെമി ഫൈനല്‍ പ്ലേ ഓഫ് സാധ്യത ഏതാണ്ട് അസ്തമിച്ച് കഴിഞ്ഞ ഒന്‍പതാം സ്ഥാനത്ത് നില്‍ക്കുന്ന നോര്‍ത്ത്ഈസ്റ്റ് യുനൈറ്റഡ് 13 മത്സരങ്ങളില്‍ നിന്ന് 11 പോയിന്റാണ് നേടിയിട്ടുള്ളത്. പ്ലേ ഓഫ് സാധ്യത ഇല്ലെങ്കിലും മറ്റ് ടീമുകളുടെ പ്ലേ ഓഫ് സാധ്യതകള്‍ക്ക് വഴിമുടക്കി നില്‍ക്കാന്‍ നോര്‍ത്ത്ഈസ്റ്റിന് കഴിയും. ഇന്നത്തേതടക്കം അഞ്ച് മത്സങ്ങളാണ് അവരുടെ പക്കലുള്ളത്.