പ്യോങ്ചങ്: വര്‍ണാഭമായ ചടങ്ങുകളോടെ ശീതകാല ഒളിംപിക്‌സിന് ദക്ഷിണ കൊറിയയിലെ പ്യോങ്ചങില്‍ തുടക്കം. ഇരു കൊറിയകളും ശത്രുത വെടിഞ്ഞ് പരസ്പരം ഹസ്തദാനം ചെയ്ത് ചരിത്രം മാറ്റിയെഴുതിയ ചടങ്ങ് കായിക സംസ്‌കാരത്തിന്റെ കരുത്ത് വിളിച്ചോതുന്നതായി മാറി. ഉദ്ഘാടന ചടങ്ങിന് ശേഷം രാജ്യങ്ങളുടെ മാര്‍ച്ച്പാസ്റ്റും അരങ്ങേറി. ല്യൂജ് താരം ശിവ കേശവന്‍ മാര്‍ച്ച് പാസ്റ്റില്‍ ഇന്ത്യന്‍ പതാകയേന്തി. താരങ്ങളായ ജഗദിഷ് സിങ്, ഹര്‍ജിന്ദര്‍ സിങ് എന്നിവരും ഇന്ത്യന്‍ സംഘത്തിലുണ്ടായിരുന്നു. ഉത്തേജക വിവാദങ്ങളെ തുടര്‍ന്ന് റഷ്യയില്‍ നിന്നെത്തിയ 168 താരങ്ങള്‍ ഒളിംപിക് പതാകയ്ക്ക് കീഴിലാണ് മാര്‍ച്ച് പാസ്റ്റിന് അണിനിരന്നത്. ഈ മാസം 25 വരെയാണ് ഒളിംപിക്‌സ് പോരാട്ടങ്ങള്‍.