ബംഗളൂരു: ഇന്ത്യന്‍ സൂപ്പര്‍ ലീഗില്‍ ബംഗളൂരു എഫ്.സിയുടെ മുന്നേറ്റം തുടരുന്നു. 15ാം പോരാട്ടത്തില്‍ കരുത്തരായ എഫ്.സി ഗോവയെ സ്വന്തം തട്ടകമായ കണ്ഠീരവ സ്റ്റേഡിയത്തില്‍ ബംഗളൂരു മറുപടിയില്ലാത്ത രണ്ട് ഗോളുകള്‍ക്ക് വീഴ്ത്തി. ജയത്തോടെ 33 പോയിന്റുകളുമായി ഒന്നാം സ്ഥാനത്ത് മുന്നേറുന്ന ബംഗളൂരു സെമി ഘട്ടത്തിന് തൊട്ടരികിലെത്തി. ഇരു പകുതികളിലായി എഡു ഗാര്‍ഷ്യ, ഡിമാസ് ഡെല്‍ഗാഡോ എന്നിവര്‍ നേടിയ ഗോളുകളാണ് ബംഗളൂരുവിന്റെ വിജയം അനായാസമാക്കിയത്. കളിയുടെ 35ാം മിനുട്ടിലാണ് ഗാര്‍ഷ്യയുടെ ഗോള്‍ വന്നത്. മത്സരം അവസാന ഘട്ടത്തിലേക്കെത്തിയപ്പോഴാണ് ഡെല്‍ഗാഡോ വല ചലിപ്പിച്ചത്.