മാലെ: മാലദ്വീപില്‍ ഇന്ത്യക്കാരന്‍ അടക്കം രണ്ടു മാധ്യമപ്രവര്‍ത്തകര്‍ അറസ്റ്റില്‍. ഫ്രഞ്ച് വാര്‍ത്താ ഏജന്‍സിയായ ഫ്രാന്‍സ് പ്രെസ്സെ റിപ്പോര്‍ട്ടര്‍മാരായ രണ്ടു പേരാണ് അറസ്റ്റിലായിട്ടുള്ളത്. ഇവരില്‍ ഒരാള്‍ ഇന്ത്യക്കാരനും ഒരാള്‍ ബ്രിട്ടീഷ് പൗരനുമാണ്.
അറസ്റ്റ് നടന്ന വിവരം പൊലിസ് സ്ഥിരീകരിച്ചിട്ടുണ്ട്. അമൃത്സര്‍ സ്വദേശി മണി ശര്‍മയും ലണ്ടനിലെ ആതിഷ് രൗജിയുമാണ് അറസ്റ്റിലായതെന്ന് വാര്‍ത്താ ഏജന്‍സി എ.എന്‍.ഐ റിപ്പോര്‍ട്ട് ചെയ്തു. ഇവരെ മാലിദ്വീപ് പൊലിസ് അറസ്റ്റ് ചെയ്ത് എമിഗ്രേഷന്‍ വകുപ്പിന് കൈമാറി. ദേശീയ സുരക്ഷാ പ്രശ്‌നങ്ങള്‍ ചൂണ്ടിക്കാട്ടിയാണ് ഇവരുടെ അറസ്റ്റ്.
രാജ്യത്ത് 15 ദിവസത്തേക്കു പ്രഖ്യാപിച്ച അടിയന്തരാവസ്ഥയുടെ ഭാഗമായി സംശയം തോന്നുന്നവരെ കസ്റ്റഡിയിലെടുക്കാന്‍ പൊലിസുകാര്‍ക്ക് അധികാരം നല്‍കിയിട്ടുണ്ട്. ഇരുവര്‍ക്കുമെതിരേ നടപടി സ്വീകരിക്കുന്നതിന് വേണ്ടിയാണ് എമിഗ്രേഷന്‍ വകുപ്പിനു കൈമാറിയതെന്ന് മാലദ്വീപ് പൊലിസ് ട്വീറ്റ് ചെയ്തു.
അതിനിടെ, തങ്ങള്‍ക്ക് മാധ്യമ സ്വാതന്ത്ര്യമില്ലെന്നും കഴിഞ്ഞ ദിവസം രാത്രി രണ്ട് ടി.വി സ്റ്റേഷനുകള്‍ അടച്ചുപൂട്ടിയെന്നും മാലദ്വീപ് പാര്‍ലമെന്റ് അംഗം പ്രതികരിച്ചു. അറസ്റ്റിലായ മാധ്യമപ്രവര്‍ത്തകരുടെ മോചനചത്തിനും രാജ്യത്ത് ജനാധിപത്യവും നിയമവാഴ്ചയും പുനഃസ്ഥാപിക്കുന്നതിനുമുള്ള ശ്രമങ്ങള്‍ നടത്തിവരികയാണെന്നും പാര്‍ലമെന്റ് അംഗം അലി സാഹിര്‍ പറഞ്ഞു. ജീവനക്കാരുടെ ഭീഷണിയെത്തുടര്‍ന്ന് പ്രതിപക്ഷാനുകൂല ടി.വി ചാനലാണ് കഴിഞ്ഞ ദിവസം അടച്ചുപൂട്ടിയതില്‍ ഒന്ന്.
രാജ്യത്തെ രാഷട്രീയ പ്രതിസന്ധിയെക്കുറിച്ചുള്ള വാര്‍ത്തകള്‍ റിപ്പോര്‍ട്ട് ചെയ്ത സംഭവത്തില്‍ തങ്ങളുടെ ജീവനക്കാര്‍ക്ക് ഭീഷണിയുള്ളതായി റാജ്ജേ ടി.വിയും അറിയിച്ചിട്ടുണ്ട്. അടിയന്തരാവസ്ഥ പ്രഖ്യാപിച്ചത് ആദ്യം റിപ്പോര്‍ട്ട് ചെയ്തത് റാജ്ജേ ടി.വിയാണ്.