നാദാപുരം: എസ്.കെ.എസ്.എസ്.എഫ് കോഴിക്കോട് ജില്ലാ സമ്മേളനം 'മദീന പാഷന്‍' ഫെബ്രുവരി 24, 25, 26 തിയ്യതികളില്‍ നാദാപുരത്ത് നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു.
ഹുദൈബിയ നഗരിയിലാണ് മൂന്ന് ദിവസത്തെ സമ്മേളനം നടക്കുക. 23ന് വൈകിട്ട് അഞ്ചിന് സമസ്ത കേന്ദ്ര മുശാവറ അംഗം ചേലക്കാട് മുഹമ്മദ് മുസ്‌ലിയാര്‍ പതാക ഉയര്‍ത്തും.
24ന് വൈകിട്ട് നാലിന് ഉദ്ഘാടന സമ്മേളനവും ഏഴിന് മജിലിസുന്നൂര്‍ ആത്മീയ സമ്മേളനവും നടക്കും.
25ന് രാവിലെ ഒന്‍പതിന് പ്രവാസി സംഗമവും വൈകിട്ട് നാലിന് മാനവികവും രാത്രി ഏഴിന് ആദര്‍ശ സമ്മേളനവും നടക്കും. 26ന് രാവിലെ 8.30 മുതല്‍ ജില്ലയിലെ വിവിധ ഭാഗങ്ങളില്‍ നിന്ന് തെരഞ്ഞെടുക്കപ്പെട്ട 5,000 പ്രതിനിധികളുടെ ക്യാംപ് ആരംഭിക്കും. രാത്രി ഏഴിന് നടക്കുന്ന സമാപന പൊതുസമ്മേളനത്തോടെ മൂന്ന് ദിവസത്തെ സമ്മേളനത്തിന് പരിസമാപ്തിയാവും.
വിവിധ സെഷനുകളിലായി സമസ്ത കേരള ജംഇയ്യത്തുല്‍ ഉലമയുടെ പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍, ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, പി. കെ കുഞ്ഞാലിക്കുട്ടി, പാണക്കാട് സയ്യിദ് അബ്ബാസലി ശിഹാബ് തങ്ങള്‍, എം.ടി അബ്ദുല്ല മുസ്‌ലിയാര്‍, പാണക്കാട് സയ്യിദ് റഷീദലി ശിഹാബ് തങ്ങള്‍, പാണക്കാട് സയ്യിദ് ഹമീദലി ശിഹാബ് തങ്ങള്‍, ഖാസി സയ്യിദ് മുഹമ്മദ്‌കോയ ജമല്ലുലൈലി, കോഴിക്കോട് വലിയ ഖാസി സയ്യിദ് നാസര്‍ ഹയ്യ് ശിഹാബ് തങ്ങള്‍, വാവാട് കുഞ്ഞിക്കോയ മുസ്‌ലിയാര്‍, അബ്ദുസ്സമദ് പൂക്കോട്ടൂര്‍, റഹ്മത്തുല്ലാ ഖാസിമി മുത്തേടം, അഡ്വ.ഓണമ്പിള്ളി മുഹമ്മദ് ഫൈസി സംവദിക്കും.
ജില്ലാ പ്രസിഡന്റ് സയ്യിദ് മുബശ്ശിര്‍ തങ്ങള്‍ ജമല്ലുലൈലി, ജനറല്‍ സെക്രട്ടറി ഒ.പി.എം അഷ്‌റഫ്, സി. എച്ച് മഹമൂദ് സഅദി, ടി. ടി.കെ ഖാദര്‍ ഹാജി, ടി .എം.വി ഹമീദ്, റാശിദ് അശ്അരി, അലി വാണിമേല്‍, ജാഫര്‍ ദാരിമി ഇരുന്നലാട് പങ്കെടുത്തു.