ചെറുപുഴ: ചെറുപുഴ പഞ്ചായത്ത് ഓഫിസിനു സമീപം പുഴയില്‍ മാലിന്യങ്ങള്‍ക്ക് തീയിട്ടതില്‍ പ്രതിഷേധം. മത്സ്യമാര്‍ക്കറ്റിനോടു ചേര്‍ന്ന് പുഴയോരത്തെ കാടുകള്‍ തൊഴിലുറപ്പു പദ്ധതിയിലെ തൊഴിലാളികള്‍ വെട്ടിമാറ്റി മാലിന്യങ്ങള്‍ക്കൊപ്പം തീയിടുകയായിരുന്നു.
പ്ലാസ്റ്റിക്കും ബാര്‍ബര്‍ ഷോപ്പുകളില്‍ നിന്നു തള്ളിയ മുടിയും ഉള്‍പ്പെടെയുള്ളവ കത്തിയതിനാല്‍ പ്രദേശത്ത് വന്‍ തോതില്‍ പുകയും ദുര്‍ഗന്ധവുമുണ്ടായി. മീന്‍ വാങ്ങാനെത്തിയവരും വില്‍പനക്കാരും പ്രതിഷേധവുമായി രംഗത്തെത്തി.
പഞ്ചായത്ത് ഓഫിസില്‍ വിവരമറിയിച്ചെങ്കിലും യാതൊരു നടപടിയുമുണ്ടായില്ല. ടൗണിലെ പല സ്ഥാപനങ്ങളില്‍ നിന്നുമുള്ള മാലിന്യങ്ങള്‍ മത്സ്യമാര്‍ക്കറ്റിനു സമീപത്തുള്ള പാലത്തി നു ചുവട്ടില്‍ പുഴയിലേക്കാണ് തള്ളുന്നത്.
പഞ്ചായത്ത് മിനി സ്റ്റേഡിയത്തിന്റെ പരിസരങ്ങളും പുഴയോരവുമാണ് മറ്റൊരു മാലിന്യനിക്ഷേപ കേന്ദ്രം. മാലിന്യങ്ങള്‍ കൊണ്ടുവന്നിടുന്നവരെ കണ്ടെത്താന്‍ കഴിയുമെന്നിരിക്കെ ഇതിനി ആരും മെനക്കെടുന്നുമില്ല.