ഡമസ്‌കസ്: സിറിയയില്‍ ഇറാന്‍ നിയന്ത്രണത്തിലുള്ള കേന്ദ്രങ്ങള്‍ അക്രമിക്കാന്‍ ശ്രമിച്ച ഇസ്‌റാഈല്‍ യുദ്ധ വിമാനം സിറിയന്‍ സേന വെടിവച്ചിട്ടു. ഇസ്‌റാഈലിന്റെ എഫ് 16 യുദ്ധ വിമാനമാണ് സിറിയയുടെ അക്രമണത്തില്‍ തകര്‍ന്നത്. ഇസ്‌റാഈല്‍ പ്രതിരോധ മന്ത്രാലയമാണ് ഇക്കാര്യം അറിയിച്ചത്.
ഇസ്‌റാഈല്‍ അതിര്‍ത്തിയിലാണ് വിമാനം തകര്‍ന്ന് വീണത്. എന്നാല്‍ വിമാനം തകരുന്നതിന്റെ മുന്‍പ് രണ്ടു പൈലറ്റുമാര്‍ പാരച്യൂട്ട് വഴി രക്ഷപ്പെട്ടു. ഇരുവരും ഗുരുതരമായ പരുക്കുകകളോടെ ഇസ്‌റാഈലിലാണ് ഇറങ്ങിയത്.
വിമാനത്തിന് നേരെയുണ്ടായ അക്രമത്തിന് ശേഷമാണോ വിമാനം പൈലറ്റുമാര്‍ ഉപേക്ഷിച്ചതിന് ശേഷമാണോ ഇവര്‍ രക്ഷപ്പെട്ടതെന്നത് വ്യക്തമല്ല. സിറിയില്‍ നടക്കുന്ന യുദ്ധത്തില്‍ ആദ്യമായാണ് ഇസ്‌റാഈലിന് വിമാനം നഷ്‌പ്പെടുന്നത്. നേരത്തെ സിറിയയില്‍ നിന്ന് ഇസ്‌റാഈലിലേക്ക് പറന്നെത്തിയ ഇറാന്റെ ആളില്ലാ നിരീക്ഷണ വിമാനം ഇസ്‌റാഈല്‍ വെടിവച്ചിട്ടിരുന്നു.
തുടര്‍ന്നായിരുന്നു ഇറാന്‍ കേന്ദ്രങ്ങള്‍ക്ക് നേരെ ഇസ്‌റാഈലിന്റെ വ്യോമാക്രമണം. സിറിയയിലെ നടന്ന റെയ്ഡിനിടെ മൂന്ന് പ്രതിരോധ പീരിങ്കിപ്പടയെയും നാല് ഇറാന്‍ സൈനിക കേന്ദ്രങ്ങളും തകര്‍ത്തതായി ഇസ്‌റാഈല്‍ ഡിഫന്‍സ് ഫോഴ്‌സ് ( ഐ.ഡി.എഫ്) അവകാശപ്പെട്ടു.
ഇറാന് സിറിയയില്‍ തങ്ങള്‍ക്ക് ഭീഷണിയാകും വിധം പ്രവര്‍ത്തിക്കുന്നുണ്ടെന്നാണ് ഇസ്‌റാഈല്‍ ആരോപണം. എന്നാല്‍ സിറിയയുടെ ഭാഗത്ത് നിന്നുള്ള കനത്ത പ്രഹരമാണ് ഇപ്പോള്‍ വിമാനം വെടിവച്ചിട്ടതോടെ ഇസ്‌റാഈലിനുണ്ടായിരിക്കുന്നത്.
ഇതിന് മുന്‍പ് 2006ല്‍ ആണ് ഇസ്‌റാഈല്‍ യുദ്ധ വിമാനം ലെബനാനില്‍ ഹിസ്ബുല്ല തകര്‍ത്തത്. അഞ്ചു പേരാണ് അന്ന് കൊല്ലപ്പെട്ടത്. നിലവില്‍ സിറിയന്‍ സര്‍ക്കാരിന് പിന്തുണയുമായി ഇറാന്‍ പിന്തുണയോടെയുള്ള ഷിയാ പോരാളികളും ലെബനാലിലെ ഹിസ്ബല്ലയും പ്രവര്‍ത്തിക്കുന്നുണ്ട്.
സിറിയന്‍ സൈന്യത്തിന്റെ വെടിവയ്പിനെ തുടര്‍ന്ന് ഇസ്‌റാഈല്‍ അക്രമണം ശക്തമാക്കിയെന്ന് ഐ.ഡി.എഫ് വക്താവ് ജോന്നാതന്‍ കോണ്‍റികസ് പറഞ്ഞു. ഡമസ്‌കസിന് സമീപമുള്ള എട്ട് ലക്ഷ്യമാക്കിയാണ് അക്രമണം നടത്തുന്നതെന്ന് അദ്ദേഹം പറഞ്ഞു. ഇസ്‌റാഈലിനെ അക്രമിക്കാന്‍ അനുവദിച്ചതോടെ സിറയ കളിക്കുന്നത് തീ കൊണ്ടാണ്. ഇതിന് വലിയ വില കൊടുക്കേണ്ടിവരുമെന്ന് ജോന്നാതന്‍ കോണ്‍റികസ് കൂട്ടിച്ചേര്‍ത്തു.