തൊടുപുഴ: അണ്ടര്‍ 14 ദക്ഷിണ മേഖലാ അന്തര്‍ സംസ്ഥാന ക്രിക്കറ്റ് പോരാട്ടത്തില്‍ കേരളത്തിന് വിജയം. ഗോവയെ ഇന്നിങ്‌സിനും 25 റണ്‍സിനും തകര്‍ത്താണ് കേരളം വിജയം സ്വന്തമാക്കിയത്. ടോസ് നേടി ഗോവയെ ബാറ്റിങിനയച്ച കേരളം അവരുടെ പോരാട്ടം 114 റണ്‍സില്‍ അവസാനിപ്പിച്ചു. മറുപടിയായി ഒന്നാം ഇന്നിങ്‌സില്‍ കേരളം 220 റണ്‍സെടുത്തു. നിരഞ്ജന്‍ വി ദേവ് (67) ടോപ് സ്‌കോററായി. 106 റണ്‍സ് ലീഡ് വഴങ്ങി രണ്ടാം ഇന്നിങ്‌സ് ബാറ്റ് ചെയ്ത ഗോവയുടെ പോരാട്ടം 81 റണ്‍സില്‍ അവസാനിപ്പിച്ചാണ് കേരളം ഇന്നിങ്‌സ് ജയം പിടിച്ചെടുത്തത്. കേരളത്തിനായി ഇടം കൈയന്‍ സ്പിന്നര്‍ അതുല്‍ സഞ്ജയ് രണ്ടിന്നിങ്‌സിലുമായി 11 വിക്കറ്റുകള്‍ വീഴ്ത്തി. ആദ്യ ഇന്നിങ്‌സില്‍ ആറും രണ്ടാം ഇന്നിങ്‌സില്‍ അഞ്ചും വിക്കറ്റുകളാണ് അതുല്‍ വീഴ്ത്തിയത്.