വാസ്‌ക്കോ ഡ ഗാമ: ഐ ലീഗില്‍ ഇന്നലെ നടന്ന മത്സരങ്ങളില്‍ യുവ താരങ്ങളുടെ കരുത്തിലിറങ്ങിയ ഇന്ത്യന്‍ ആരോസ് ഒന്നിനെതിരേ രണ്ട് ഗോളുകള്‍ക്ക് ചര്‍ച്ചില്‍ ബ്രദേഴ്‌സിനെ നാടകീയമായി വീഴ്ത്തി. മറ്റൊരു പോരാട്ടത്തില്‍ വടക്കുകിഴക്കന്‍ നാട്ടങ്കത്തില്‍ നെരോക്കയും ഐസ്വാളും ഗോള്‍രഹിത സമനിലയില്‍ പിരിഞ്ഞു.
കളി അവസാനിക്കാന്‍ നിമിഷങ്ങള്‍ മാത്രമുള്ളപ്പോള്‍ നേടിയ രണ്ട് ഗോളുകളാണ് ഇന്ത്യന്‍ ആരോസിന് നാടകീയ വിജയം സമ്മാനിച്ചത്. 11ാം മിനുട്ടില്‍ ഗോള്‍ നേടി ലീഡുമായി വിജയത്തിലേക്ക് ചര്‍ച്ചില്‍ മുന്നേറവേയാണ് അവസാന നിമിഷങ്ങളില്‍ ഗോള്‍ വഴങ്ങി വിജയിച്ച മത്സരം അവര്‍ തോറ്റുകൊടുത്തത്. 90 മിനുട്ട് പിന്നിട്ടപ്പോള്‍ ഇഞ്ച്വറി ടൈമായി ലഭിച്ച മൂന്ന് മിനുട്ടിനിടെ അഭിജിത് സര്‍ക്കാര്‍ നേടിയ ഇരട്ട ഗോളുകളാണ് ഇന്ത്യന്‍ ആരോസിന് അപ്രതീക്ഷിത വിജയമൊരുക്കിയത്.
വടക്കുകിഴക്കന്‍ ടീമുകളുടെ നാട്ടങ്കത്തില്‍ നെരോക്കയുടെ ഒന്നാം സ്ഥാനത്തെത്താനുള്ള മോഹം തല്ലിക്കെടുത്തിയാണ് നിലവിലെ ചാംപ്യന്‍മാരായ ഐസ്വാള്‍ ഗോള്‍രഹിത സമനില പിടിച്ചത്.
മത്സരം വിജയിച്ചിരുന്നെങ്കില്‍ മിനെര്‍വ പഞ്ചാബിനെ പിന്തള്ളി നെരോക്കയ്ക്ക് പോയിന്റ് പട്ടികയില്‍ ഒന്നാം സ്ഥാനം സ്വന്തമാക്കാമായിരുന്നു. നിലവില്‍ 28 പോയിന്റുമായി നെരോക്ക രണ്ടാം സ്ഥാനത്ത്.