മെല്‍ബണ്‍: ത്രിരാഷ്ട്ര ടി20 പോരാട്ടത്തില്‍ ആസ്‌ത്രേലിയക്ക് തുടര്‍ച്ചയായ മൂന്നാം ജയം. ജയത്തോടെ അവര്‍ ഫൈനലിലേക്കും മുന്നേറി. ഇംഗ്ലണ്ടിനെ ഏഴ് വിക്കറ്റിന് തകര്‍ത്താണ് ഓസീസ് വിജയിച്ചത്. ആദ്യം ബാറ്റ് ചെയ്ത ഇംഗ്ലണ്ടിന്റെ പോരാട്ടം 20 ഓവറില്‍ ഏഴ് വിക്കറ്റ് നഷ്ടത്തില്‍ 137 റണ്‍സില്‍ അവസാനിപ്പിച്ച ഓസീസ് 14.3 ഓവറില്‍ മൂന്ന് വിക്കറ്റ് മാത്രം നഷ്ടപ്പെടുത്തി 138 റണ്‍സെടുത്ത് ലക്ഷ്യം കാണുകയായിരുന്നു.
ഡിയാര്‍സി ഷോര്‍ട് (പുറത്താകാതെ 36), ഗ്ലെന്‍ മാക്‌സ്‌വെല്‍ (26 പന്തില്‍ 39), ക്രിസ് ലിന്‍ (19 പന്തില്‍ 31), ആരോണ്‍ ഫിഞ്ച് (പുറത്താകാതെ അഞ്ച് പന്തില്‍ 20) എന്നിവരുടെ ബാറ്റിങാണ് ആസ്‌ത്രേലിയക്ക് അനായാസ വിജയമൊരുക്കിയത്.
നേരത്തെ ടോസ് നേടി ബൗളിങ് തിരഞ്ഞെടുത്ത ഓസീസ് ഇംഗ്ലണ്ടിനെ തുടക്കത്തില്‍ തന്നെ വിറപ്പിച്ചു. 34 റണ്‍സെടുക്കുന്നതിനിടെ അവര്‍ക്ക് മൂന്ന് വിക്കറ്റുകള്‍ നഷ്ടമായിരുന്നു. പിന്നീട് മധ്യനിര നടത്തിയ രക്ഷാപ്രവര്‍ത്തനമാണ് ഇംഗ്ലീഷ് സ്‌കോറിന് മാന്യത നല്‍കിയത്. ക്യാപ്റ്റന്‍ ജോസ് ബട്‌ലര്‍ 46 റണ്‍സുമായി ടോപ് സ്‌കോററായി. ബില്ലിങ്‌സ് (29), വിന്‍സ് (21) എന്നിവരും ഭേദപ്പെട്ട പ്രകടനം നടത്തി. ഓസീസിനായി കെയ്ന്‍ റിച്ചാര്‍ഡ്‌സന്‍ മൂന്ന് വിക്കറ്റുകള്‍ വീഴ്ത്തി. സ്റ്റാന്‍ലേക് രണ്ട് വിക്കറ്റുകള്‍ പിഴുതു. റിച്ചാര്‍ഡ്‌സനാണ് കളിയിലെ കേമന്‍.