റിയാദ്: നാല് ദിവസത്തെ സഊദി സന്ദര്‍ശനത്തിനെത്തിയ ഇന്ത്യന്‍  നേവി അഡ്മിറല്‍ ചീഫ് സുനില്‍ ലംബ സഊദി പ്രതിരോധ അധികൃതരുമായി ചര്‍ച്ച നടത്തി. ഫെബ്രുവരി നാല് മുതല്‍ എട്ടു വരെ സഊദിയില്‍ തങ്ങിയ ഇദ്ദേഹം സുരക്ഷാ കാര്യത്തില്‍ ഇരു രാജ്യങ്ങളുടെയും സഹകരണത്തില്‍ ചര്‍ച്ച നടത്തിയതായി അധികൃതര്‍ പറഞ്ഞു.  മേഖലയില്‍ സുരക്ഷാ പശ്ചാത്തലം  മാറിക്കൊണ്ടിരിക്കുന്ന  സാഹചര്യത്തില്‍  പൊതുവായ തന്ത്രപ്രധാന താല്‍പര്യങ്ങള്‍ പിന്തുടരുന്നതിനുള്ള സഹകരണം വര്‍ദ്ധിപ്പിക്കും. കൂടാതെ പ്രതിരോധ സഹകരണത്തിന്റെ പുതിയ സാധ്യതകള്‍ ആരായാനും അധികൃതരുമായുള്ള ചര്‍ച്ചയില്‍ തീരുമാനമായി.
     

സഊദി ഡെപ്യുട്ടി പ്രതിരോധ മന്ത്രി മുഹമ്മദ് ബിന്‍ അബ്ദുല്ല അല്‍ ഐസി, സഊദി റോയല്‍ ആംഡ് ഫോഴ്‌സ് ജനറല്‍ അബ്ദുറഹ്മാന്‍ ബിന്‍ സാലിഹ് അല്‍ ബുന്യാന്‍, സഊദി നേവല്‍ ഫോഴ്‌സ് കമാണ്ടര്‍ വൈസ് അഡ്മിറല്‍ ഫഹദ് ബിന്‍ അബ്ദുല്ല അല്‍ ഗുഫൈലി എന്നിവരുമായാണ് ചര്‍ച്ച നടത്തിയത്. സഊദിയിലെ വിവിധ നാവിക സ്ഥാപനങ്ങളും നിര്‍മ്മാണ കേന്ദ്രങ്ങളിലും ഇന്ത്യന്‍  നേവി അഡ്മിറല്‍ ചീഫ് സുനില്‍ ലംബ സന്ദര്‍ശനം നടത്തി.