ബംഗളുരു: രാസ മാലിന്യങ്ങള്‍ അടിഞ്ഞുകൂടി ബംഗളുരുവില്‍ ഒരു തടാകം കത്തിപുകഞ്ഞുകൊണ്ടിരിക്കുന്നു. ബെല്ലന്തൂര്‍ തടാകത്തില്‍ ഇന്നലെ വൈകീട്ട് നാലോടെ തുടങ്ങിയ തീ കെടുത്താനുള്ള തന്ത്രമറിയാതെ കുടുങ്ങിയിരിക്കുകയാണ് അഗ്നിശമന സേനാംഗങ്ങള്‍. കനത്ത പുക കാരണം സമീപത്തെ റോഡില്‍ വാഹനമോടിക്കാന്‍ കഴിയാത്ത അവസ്ഥയുമുണ്ട്.

പുകയുടെ ഉറവിടം കണ്ടെത്താനോ തടാകത്തിനടുത്തേക്ക് പോകാനോ കഴിയാത്ത അവസ്ഥയാണ് ഇപ്പോഴുള്ളതെന്ന് അഗ്നിശമനാ സേനാംഗം പ്രതികരിച്ചു.

ടണ്‍ കണക്കിന് മാലിന്യങ്ങളാണ് ദിവസവും തടാകത്തില്‍ അടിഞ്ഞു കൂടുന്നത്. മുന്‍പും തീപിടുത്തമുണ്ടായതിനെ തുടര്‍ന്ന് ബെലന്തൂര്‍ തടാകം വാര്‍ത്തകളില്‍ ഇടം നേടിയിരുന്നു. പുക ജനവാസ കേന്ദ്രങ്ങളിലേക്കും വ്യാപിച്ചതോടെ ആളുകള്‍ ഒഴിഞ്ഞു പോകേണ്ടുന്ന സ്ഥിതിയാണുള്ളത്.