ന്യൂഡല്‍ഹി: ആര്‍.ബി.ഐ ഗവര്‍ണറായി ചുമതലയേല്‍ക്കുന്നതിന് മുന്‍പ് തന്നെ അദ്ദേഹം ഒപ്പുവെച്ച രണ്ടായിരം രൂപയുടെ അച്ചടി തുടങ്ങിയതായി റിപ്പോര്‍ട്ട്. ദേശീയ മാധ്യമമായ ഹിന്ദുസ്ഥാന്‍ ടൈംസാണ് ഇത് സംബന്ധിച്ച റിപ്പോര്‍ട്ട് പുറത്ത് കൊണ്ടു വന്നത്.

ഓഗസ്റ്റ് 20 നാണ് പട്ടേലിനെ ആര്‍.ബി.ഐ ഗവര്‍ണറായി പ്രഖ്യാപിക്കുന്നത്. പിന്നീട് സെപ്തംബര്‍ നാലിനാണ് പട്ടേല്‍ ഔദ്യോഗികമായി സ്ഥാനം ഏറ്റെടുക്കുന്നത്. എന്നാല്‍ ഗവര്‍ണറായി പ്രഖ്യാപിച്ചതിന് ശേഷമുള്ള ആദ്യ പ്രവൃത്തി ദിനമായ ഓഗസ്റ്റ് 22 നാണ് പുതിയ നോട്ടുകളുടെ അച്ചടി തുടങ്ങിയത്. അതായത് അച്ചടി തുടങ്ങിയപ്പോള്‍ രഘുറാം രാജന്‍ തന്നെയാണ് ആര്‍.ബി.ഐ ഗവര്‍ണര്‍. അതുകൊണ്ടുതന്നെ രാജന്‍ ഉള്ളപ്പോള്‍ അച്ചടിച്ച നോട്ടുകളില്‍ പട്ടേലിന്റെ ഒപ്പ് വന്നതാണ് ഇപ്പോള്‍ വിവാദമായിരിക്കുന്നത്.

റിസര്‍വ്വ് ബാങ്ക് നോട്ട് പിന്‍വലിക്കലിനെ സംബന്ധിച്ച് പാര്‍ലമെന്ററി ധനകാര്യ സമിതിയില്‍ മറുപടി നല്‍കിയത് 2016 ജൂണില്‍ ആരംഭിച്ച പ്രക്രിയ ആണെന്നാണ്.

പുതിയ രണ്ടായിരം നോട്ട് പുറത്തിറക്കുന്ന തീരുമാനത്തിന് രഘുരാം രാജന്റെ പിന്തുണ ഉണ്ടായിരുന്നോ, എന്തുകൊണ്ടാണ് പുതിയ നോട്ടില്‍ അദ്ദേഹത്തിന്‍റെ ഒപ്പ് ഇല്ലാത്തത് എന്ന ചോദ്യങ്ങള്‍ക്ക് ധനകാര്യ മന്ത്രാലയവും ആര്‍ബിഐയും ഉത്തരം നല്‍കിയില്ല എന്നും  റിപ്പോര്‍ട്ടില്‍ പറയുന്നു.