വാടാനപ്പള്ളി: ഏങ്ങണ്ടിയൂരില്‍ വൃദ്ധ ദമ്പതികളുടെ വീടിന് നേരെ ആക്രമണം. ഏങ്ങണ്ടിയൂര്‍ മാമ്പുള്ളിക്കാവ് ക്ഷേത്രത്തിന് കിഴക്ക് കടവില്‍ ബാലസുബ്രഹ്മണ്യന്റെ വീടിന് നേരെയാണ് ഇന്നലെ രാത്രിയില്‍ ആക്രമണമുണ്ടായത്.
വീടിന്  കല്ലെറിയുന്ന ശബ്ദം കേട്ട് ബാലസുബ്രഹ്മണ്യനും ഭാര്യ നളിനാക്ഷിയും പുറത്തേക്ക് വന്നപ്പോള്‍ വടിയുമായി എട്ടംഗസംഘം ഓടിയെത്തുകയായിരുന്നു.
ഇതോടെ ദമ്പതികള്‍ അകത്തേക്ക് കയറി വാതിലടച്ചു. മുറ്റത്തെ ചെടിച്ചട്ടി തകര്‍ത്ത അക്രമിസംഘം വാഴകളും ചവിട്ടി നശിപ്പിച്ചു.
 ഇരുനില വീടിന്റെ താഴത്തെ നിലയിലെ ജനല്‍ചില്ല് അക്രമികള്‍ കല്ലെറിഞ്ഞ് തകര്‍ത്തു. വാതില്‍ ചവിട്ടിപ്പൊളിക്കാന്‍ ശ്രമിച്ച ശേഷമാണ് സംഘം രക്ഷപ്പെട്ടത്. വിവരമറിഞ്ഞ് വാടാനപ്പള്ളി പൊലിസ് സ്ഥലത്തെത്തിയിരുന്നു. അതേസമയം നടവഴിയെച്ചൊല്ലി ബന്ധുവും ദമ്പതികളുമായി തര്‍ക്കമുള്ളതായി പൊലിസ് പറഞ്ഞു.