ലണ്ടന്‍: ഇംഗ്ലീഷ് കരുത്തരായ മാഞ്ചസ്റ്റര്‍ യുനൈറ്റഡിനു യുവേഫ യൂറോപ്പ ലീഗ് പോരാട്ടത്തില്‍ തകര്‍പ്പന്‍ ജയം. മറുപടിയില്ലാത്ത മൂന്നു ഗോളുകള്‍ക്ക് അവര്‍ സെന്റ് എറ്റിനയെ കീഴടക്കി. മറ്റു മത്സരങ്ങളില്‍ ഇറ്റാലിയന്‍ കരുത്തരായ റോമ മറുപടിയില്ലാത്ത നാലു ഗോളുകള്‍ക്ക് വിയ്യാറലിനേയും ജര്‍മന്‍ ടീം ഷാല്‍ക്കെ ഗ്രീക്ക് ടീം പി.എ.ഒ.കെ എഫ്.സിയേയും പരാജയപ്പെടുത്തി. അതേസമയം ഇംഗ്ലീഷ് കരുത്തരായ ടോട്ടനം ഹോട്‌സ്പറിനെ ബെല്‍ജിയം ടീം ജെന്റ് അട്ടിമറിച്ചു. മറുപടിയില്ലാത്ത ഒറ്റ ഗോളിനാണു ടോട്ടനം തോല്‍വി വഴങ്ങിയത്. ഫോയോരെന്റിന, റോസ്റ്റോവ്, ഷാക്തെര്‍ ഡൊനെട്‌സ്‌ക്, ആന്റര്‍ലെറ്റ്, ലിയോണ്‍, ബെസിക്റ്റസ്, അത്‌ലറ്റിക്ക് ബില്‍ബാവോ ടീമുകളും വിജയം സ്വന്തമാക്കി.
വെറ്ററന്‍ സ്‌ട്രൈക്കര്‍ സ്ലാട്ടന്‍ ഇബ്രാഹിമോവിചിന്റെ ഹാട്രിക്ക് ഗോളുകളാണു സ്വന്തം തട്ടകമായ ഓള്‍ഡ് ട്രാഫോര്‍ഡില്‍ മാഞ്ചസ്റ്ററിനെ വിജയിപ്പിച്ചത്. ആദ്യ പകുതിയുടെ 15ാം മിനുട്ടില്‍ ഗോള്‍ നേടി മാഞ്ചസ്റ്ററിനെ മുന്നിലെത്തിച്ച ഇബ്ര രണ്ടാം പകുതി തുടങ്ങി മത്സരം അവസാന ഘട്ടത്തിലേക്ക് അടുത്തപ്പോഴാണു ശേഷിച്ച രണ്ടു ഗോളുകളും വലയിലെത്തിച്ച് ഹാട്രിക്കും ടീമിന്റെ വിജയവും പൂര്‍ത്തിയാക്കിയത്. 75, 88 മിനുട്ടുകളിലായിരുന്നു സ്വീഡിഷ് താരത്തിന്റെ ബാക്കിയുള്ള ഗോളുകള്‍. ജയത്തോടെ മാഞ്ചസ്റ്റര്‍ പ്രീ ക്വാര്‍ട്ടര്‍ സാധ്യതകള്‍ സജീവമാക്കി.
എഡിന്‍ സെക്കോ നേടിയ ഹാട്രിക്ക് മികവിലാണു ഇറ്റാലിയന്‍ കരുത്തരായ റോമ എവേ പോരാട്ടത്തില്‍ സ്പാനിഷ് ടീം വിയ്യാറലിനെ തുരത്തിയത്. 32ാം മിനുട്ടില്‍ എമേഴ്‌സന്റെ ഗോളില്‍ റോമ മുന്നിലെത്തി.
രണ്ടാം പകുതിയുടെ 65, 79, 86 മിനുട്ടുകളിലാണു ബെല്‍ജിയം താരമായ സെക്കോയുടെ ഗോളുകള്‍. എവേ പോരാട്ടത്തിലെ തകര്‍പ്പന്‍ ജയത്തോടെ റോമ പ്രീ ക്വാര്‍ട്ടറിലേക്ക് കൂടുതല്‍ അടുക്കുകയും ചെയ്തു.