ശ്രീനഗര്‍: ജമ്മുകശ്മീരിലെ ശ്രീനഗറില്‍ ഇന്നു പുലര്‍ച്ചെയുണ്ടായ ഏറ്റു മുട്ടലില്‍ പരുക്കേറ്റ സൈനികന്‍ മരിച്ചു. സിആര്‍പിഎഫ് ജവാന്‍ മുജാഹിദ് ഖാനാണ് മരിച്ചത്. ബിഹാര്‍ സ്വദേശിയായ മുജാഹിദ് ഖാന്‍ ബറ്റാലിയന്‍ 49ന്റെ ഭാഗമായിരുന്നു.

ഇന്ന് പുലര്‍ച്ചെ നാലു മണിയോടെയാണ് സൈനിക ക്യാംപിനു നേരെ ഭീകരാക്രമണമുണ്ടായത്. ക്യാംപില്‍ അതിക്രമിച്ചു കയറിയ മൂന്നു ഭീകരരേയും സൈന്യം വധിച്ചിരുന്നു. ശ്രീനഗര്‍ കരണ്‍നഗര്‍ ഏരിയയിലുള്ള ക്യാംപിലേക്കാണ് സൈനിക വേഷത്തില്‍ ഭീകരര്‍ അതിക്രമിച്ചു കയറിയത്. കാവല്‍ക്കാര്‍ക്ക് നേരെ വെടിയുതിര്‍ത്ത സംഘം ക്യാമ്പിനുള്ളില്‍ കുടുംബങ്ങള്‍ താമസിക്കുന്നിടത്ത് ഒളിയ്ക്കുകയായിരുന്നു. ഇവര്‍ക്കായുള്ള തെരച്ചിലിന്റെ ഭാഗമായി 150 ഓളം വീടുകളില്‍ നിന്ന് ആളുകളെ മാറ്റിപ്പാര്‍പ്പിച്ചു. ഭീകരര്‍ ഒളിതച്ചുതാമസിച്ചയിടത്തു നിന്ന് ആയുധങ്ങളും ഉപയോഗിച്ച സിറിഞ്ചുകളും കണ്ടെടുത്തു. കൊല്ലപ്പെട്ട ഭീകരര്‍ പാകിസ്താന്‍ പൗരന്മാരാണ്.