കൊണ്ടോട്ടി: കരിപ്പൂര്‍ വിമാനത്താവളത്തില്‍ ഡി.ജി.സി.എ സംഘത്തിന്റെ സുരക്ഷാ പരിശോധന തുടങ്ങി. ഇന്നലെ ചെന്നൈയില്‍ നിന്നാണ് ഡി.ജി.സി.എ(ഡയറക്ടര്‍ ജനറല്‍ ഓഫ് സിവില്‍ എവിയേഷന്‍) ഡെപ്യൂട്ടി ഡയറക്ടര്‍ ദുരൈ രാജിന്റെ നേതൃത്വത്തിലുള്ള രണ്ടംഗ സംഘം കരിപ്പൂരിലെത്തി പരിശോധന ആരംഭിച്ചത്. കരിപ്പൂരില്‍ റണ്‍വേ എന്‍ഡ് സേഫ്റ്റി ഏരിയ(റിസ)നിര്‍മാണം ആരംഭിച്ചതിന്റെ പശ്ചാത്തലത്തിലാണ് പരിശോധന നടത്തുന്നത്.
വിമാനത്താവളത്തിലെ റണ്‍വേ, ടെര്‍മിനല്‍, എയര്‍ട്രാഫിക് കണ്‍ട്രോള്‍ അടക്കമുള്ളവ പരിശോധിക്കുന്നുണ്ട്. മുതിര്‍ന്ന ഉദ്യോഗസ്ഥരുമായി സംഘം ചര്‍ച്ച നടത്തും. വിമാനങ്ങളുടെ സുരക്ഷിത ലാന്റിങിന് സഹായിക്കുന്ന ഇന്‍സ്ട്രുമെന്റ് ലാന്റിങ് സിസ്റ്റം (ഐ.എല്‍.എസ്) സംഘം പരിശോധിക്കും. വിമാനങ്ങളുടെ പറന്നിറങ്ങലും സംഘം വിലയിരുത്തും.