മഞ്ചേരി: പൂര്‍വീക പണ്ഡിതന്‍മാരുടെ ജീവിത വിശുദ്ധിയാണ് സമസ്തക്കും പോഷക സംഘടനകള്‍ക്കും അഭിമാനകരമായ അസ്തിത്വം നല്‍കിയതെന്നും അതു നിലനിര്‍ത്താന്‍ പുതിയ തലമുറ തയ്യാറാകണമെന്നും സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുകോയ തങ്ങള്‍ പറഞ്ഞു. മഞ്ചേരി ജമിഅ ഇസ്‌ലാമിയ്യയില്‍ എസ്.കെ.എസ്.എസ്.എഫ് മദീന പാഷന്‍ - ജമിഅ ഇസ്‌ലാമിയ്യ സില്‍വര്‍ ജൂബിലി സമാപന സമ്മേളനങ്ങളുടെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു തങ്ങള്‍. മത സാമൂഹിക സേവന രംഗങ്ങളിലെല്ലാം ആത്മാര്‍ഥതയും വിശുദ്ധമായ പ്രവര്‍ത്തനങ്ങളും കാഴ്ച്ചവെക്കാന്‍ കഴിയാത്തതാണ് ചില സംഘടനകള്‍ അപചയത്തിലേക്കു വഴുതിപോവാന്‍ കാരണമായത്. നിഷ്‌കളങ്കമായ പ്രവര്‍ത്തനങ്ങളുണ്ടാവുമ്പോള്‍ തെറ്റിദ്ധാരണകള്‍ക്കു ഇടമുണ്ടാവില്ലന്നും മതത്തിന്റെ പാരമ്പര്യത്തില്‍ നിന്നും വഴിമാറാതെ പൂര്‍വീക പാതയിലൂടെ മുന്നോട്ടുപോവാന്‍ പുതിയ തലമുറകള്‍ക്കു സാധിക്കണമെന്നും തങ്ങള്‍ പറഞ്ഞു. എസ്.കെ.എസ്.എസ്.എഫ് ജില്ലാ പ്രസിഡന്റ് സയ്യിദ് ഫഖുറുദ്ദീന്‍ തങ്ങള്‍ അധ്യക്ഷനായി. തദ്ദേശ സ്വയം ഭരണ സ്ഥാപനങ്ങള്‍ക്കുള്ള അവാര്‍ഡ് എസ്.കെ.എസ്.എസ്.എഫ് സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങള്‍ ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണനു കൈമാറി. സമ്മേളന സുവനീര്‍ സയ്യിദ് മുഹമ്മദ് കോയതങ്ങള്‍ ജമലുല്ലൈലി പ്രകാശനം ചെയ്തു. കെ.കെ.എസ് തങ്ങള്‍ വെട്ടിച്ചിറ, ബി.എസ്.കെ തങ്ങള്‍, സയ്യിദ് ഹാശിറലി ശിഹാബ് തങ്ങള്‍, പാണക്കാട് സയ്യിദ് സാബിഖലി ശിഹാബ് തങ്ങള്‍, ഒ.എം.എസ് തങ്ങള്‍ നിസാമി, ഹസന്‍ സഖാഫി പൂക്കോട്ടൂര്‍, സലീം എടക്കര, ഷാഹുല്‍ഹമീദ് മേല്‍മുറി, ജബ്ബാര്‍ ഹാജി, ഒ.ടി മൂസ മുസ്‌ലിയാര്‍, ആനമങ്ങാട് മുഹമ്മദ്കുട്ടി ഫൈസി, ശഹീര്‍അന്‍വരി, സി.എച്ച് ത്വയ്യിബ് ഫൈസി, സത്താര്‍ പന്തല്ലൂര്‍, ടി.പി ഇപ്പമുസ്‌ലിയാര്‍, ഹൈദര്‍ഫൈസി പനങ്ങാങ്ങര തുടങ്ങിയവര്‍ പ്രസംഗിച്ചു.