പെര്‍ള (കാസര്‍കോട്): ഒരു കുടുംബത്തിലെ മൂന്നു കുട്ടികള്‍ കുളത്തില്‍ വീണു മരിച്ചു. കാസര്‍കോട് എണ്‍മകജെ പഞ്ചായത്തിലെ ചവര്‍ക്കാട് സായ കൊമ്പരഡുക്കയിലെ ഖാസീം അസ്മ ദമ്പതികളുടെ മകള്‍ കാട്ടുകുക്കെ ബാല പ്രഭ സ്‌കൂളിലെ അഞ്ചാം തരം വിദ്യാര്‍ഥിനി മുംതാസ്(10), സുഹ്‌റ ഹാസീം ദമ്പതികളുടെ മക്കളായ ഫാത്തിമത്ത് ഫസീല(10), ഫിത്താമിന(7) എന്നിവരാണ് മരിച്ചത്.

ഇരുവരും അഡ്യനഡുക്ക ഗവ. എല്‍.പി സ്‌കൂള്‍ വിദ്യാര്‍ഥിനികളാണ്. വൈകുന്നേരം മൂന്നരയോടെ വീടിന്റെ സമീപത്തെ അയല്‍വാസിയുടെ കവുങ്ങിന്‍ തോട്ടത്തിലെ കുളത്തില്‍ കുളിക്കാന്‍ പോയതായിരുന്നു പെണ്‍കുട്ടികള്‍. കുളിക്കുന്നതിനിടെ കാല്‍ വഴുതി വീഴുകയായിരുന്നു. മുംതാസിന്റെ സഹോദരി ഫസ്‌നയും (ഏഴ്) ഇവര്‍ക്കൊപ്പമുണ്ടായിരുന്നു.

മറ്റുള്ളവര്‍ മുങ്ങിത്താഴുന്നത് കണ്ട് ഫസ്‌നയാണ് വിവരം വീട്ടിലറിയിച്ചത്. വീട്ടുകാരും നാട്ടുകാരുമെത്തി നടത്തിയ തിരച്ചിലിലാണ് മൂന്നുപേരെയും പുറത്തെടുത്തത്. അപ്പോഴേക്കും എല്ലാവരും മരിച്ചിരുന്നു. മൃതദേഹങ്ങള്‍ കാസര്‍കോട് ജനറല്‍ ആശുപത്രി മോര്‍ച്ചറിയില്‍ പോസ്റ്റുമോര്‍ട്ടം നടത്തി. ഹാഷിംസുഹറ ദമ്പതികളുടെ മറ്റൊരു മകള്‍: ഫായിസ (ഒന്നര).