ഇസ്‌ലാമാബാദ്: സൂഫി ദര്‍ഗയിലുണ്ടായ സ്‌ഫോടനത്തിന്റെ പശ്ചാത്തലത്തില്‍ ഭീകരസംഘടനകള്‍ക്കെതിരേ നടപടി ശക്തിപ്പെടുത്തി പാകിസ്താന്‍. ഇതിന്റെ ആദ്യ പടിയായി അഫ്ഗാനിസ്ഥാനിലേക്കുള്ള പ്രധാന അതിര്‍ത്തി അടച്ചതായി പാക് സൈന്യം വ്യക്തമാക്കി. അഫ്ഗാനിസ്ഥാനിലേക്ക് ചരക്ക് കയറ്റി അയക്കുന്നത് തടഞ്ഞിട്ടുണ്ട്. ഭീകരര്‍ക്ക് അഫ്ഗാനിസ്ഥാനില്‍ സുരക്ഷിത താവളമുണ്ടെന്നും ഇവര്‍ക്കെതിരേ അടിയന്തര നടപടിയെടുക്കണമെന്നുമാണ് പാകിസ്താന്റെ ആവശ്യം.
അതേസമയം അഫ്ഗാനിസ്ഥാനിലുള്ള തീവ്രവാദ സംഘടനയായ ജമാത്ത് ഉല്‍ അഹ്‌ററിന്റെ നാലു ഒളിത്താവളങ്ങളും ഒരു പരിശീലന കേന്ദ്രവും തകര്‍ത്തതായി പാക് സുരക്ഷാ സേന വ്യക്തമാക്കി. ഭീകരകേന്ദ്രങ്ങളെ കുറിച്ച് അഫ്ഗാനിസ്ഥാന്‍ പാകിസ്താന്‍ സേനയെ അറിയിച്ചതിന് ഏതാനും മണിക്കൂറുകള്‍ക്കകമാണ് ഭീകരകേന്ദ്രങ്ങള്‍ തകര്‍ത്തത്.
76 കേന്ദ്രങ്ങളുടെ പട്ടികയാണ് നല്‍കിയത്. ഖൈബര്‍ പ്രവിശ്യയിലെ കേന്ദ്രങ്ങളെയാണ് സേന പ്രധാനമായും ലക്ഷ്യമിട്ടത്. ജമാത്ത് ഉള്‍ അഹ്‌ററിന്റെ പ്രധാന നേതാവായ ആദില്‍ ബച്ചായും കൊല്ലപ്പെട്ടതായി അനൗദ്യോഗിക റിപ്പോര്‍ട്ടുണ്ട്.