മനാമ : ബഹ്‌റൈനില്‍ ഇത്തവണ ലഭിച്ചത് റെക്കോര്‍ഡ് മഴയാണെന്ന് അധികൃതര്‍.
ബഹ്‌റൈന്റെ ചരിത്രത്തില്‍ രണ്ടാമത്തെ ഏറ്റവും കൂടിയ അളവിലുള്ള മഴയാണ് ഫെബ്രുവരി 11 മുതല്‍ ലഭിച്ചുകൊണ്ടിരിക്കുന്നതെന്ന് മീറ്ററോളജിക്കല്‍ ഡയറക്ടര്‍ ആദില്‍ ദഹം പറഞ്ഞു.
88 മില്ലി മീറ്റര്‍ (64 ക്യൂബിക് മീറ്റര്‍) ആണ് രാജ്യത്ത് ഇത്രയും ദിവസങ്ങള്‍ കൊണ്ട് ലഭിച്ച മഴ. നേരത്തെ 1988ലായിരുന്നു ഏറ്റവും കൂടിയ അളവില്‍ മഴയുണ്ടായത്. 106.8 മില്ലി മീറ്റര്‍.
ഒരാഴ്ചയോളം നീണ്ടുനിന്ന ശക്തമായ മഴയില്‍ രാജ്യത്തെ പല പ്രദേശങ്ങളും വെള്ളക്കെട്ടിലായിരുന്നു. പലയിടങ്ങളിലും വൈദ്യുതി തടസപ്പെട്ടു. കഠിനപരിശ്രമം നടത്തിയാണ് വെള്ളക്കെട്ടുകള്‍ നീക്കിയത്.
മഴമേഘങ്ങള്‍ ഗള്‍ഫ് മേഖലയുടെ തെക്കുഭാഗത്തേക്ക് നീങ്ങാന്‍ തുടങ്ങിയതായും, ഇന്ന് മുതല്‍ അടുത്ത മൂന്ന് ദിവസങ്ങളില്‍ താപനില ഇനിയും കുറയുമെന്നും ആദില്‍ ദഹമാന്‍ വ്യക്തമാക്കി.