മുംബൈ: ഇന്ത്യന്‍ പര്യടനത്തിന്റെ ഭാഗമായുള്ള ത്രിദിന സന്നാഹ മത്സരത്തില്‍ ആസ്‌ത്രേലിയക്ക് മികച്ച സ്‌കോര്‍. ഇന്ത്യ എക്കെതിരേ ആസ്‌ത്രേലിയ ഒന്നാം ഇന്നിങ്‌സില്‍ ഏഴു വിക്കറ്റ് നഷ്ടത്തില്‍ 469 റണ്‍സെടുത്ത് ഡിക്ലയര്‍ ചെയ്തു.
ഒന്നാം ഇന്നിങ്‌സ് തുടങ്ങിയ ഇന്ത്യ എ ടീം രണ്ടാം ദിനം കളി നിര്‍ത്തുമ്പോള്‍ നാലു വിക്കറ്റ് നഷ്ടത്തില്‍ 176 റണ്‍സെന്ന നിലയില്‍. 85 റണ്‍സുമായി പുറത്താകാതെ നില്‍ക്കുന്ന ശ്രേയസ് അയ്യരിലാണ് ഇന്ത്യ എയുടെ പ്രതീക്ഷ. അഖില്‍ ഹെര്‍വാദ്കര്‍ (നാല്), പ്രിയങ്ക് പഞ്ചാല്‍ (36), അങ്കിത് ബാവ്‌നെ (25), ക്യാപ്റ്റന്‍ ഹര്‍ദിക് പാണ്ഡ്യ (19) എന്നിവരുടെ വിക്കറ്റുകളാണ് ഇന്ത്യ എയ്ക്ക് നഷ്ടമായത്. ശ്രേയസ് അയ്യര്‍ക്കൊപ്പം മൂന്നു റണ്‍സുമായി ഋഷഭ് പന്ത് ക്രീസിലുണ്ട്.
നേരത്തെ സ്റ്റീവന്‍ സ്മിത്ത് (107)ഷോണ്‍ മാര്‍ഷ് (104) എന്നിവരുടെ സെഞ്ച്വറിക്ക് പിന്നാലെ മിച്ചല്‍ മാര്‍ഷ് (75), മാത്യു വെയ്ഡ് (64)എന്നിവര്‍ അര്‍ധ സെഞ്ച്വറിയുമായി തിളങ്ങി. ഇന്ത്യന്‍ ബൗളര്‍മാരില്‍ നവദീപ് സയ്‌നി രണ്ടു വിക്കറ്റുകള്‍ വീഴ്ത്തി.