തിരുവനന്തപുരം: കേന്ദ്ര സര്‍ക്കാരിന്റെ ജനവിരുദ്ധ നയങ്ങള്‍ക്കെതിരേ ഡി.വൈ.എഫ്.ഐ പ്രവര്‍ത്തകര്‍ രാജ്യവ്യാപകമായി ട്രെയിന്‍ തടഞ്ഞു. തിരുവനന്തപുരം സെന്‍ട്രല്‍ റെയില്‍വേ സ്‌റ്റേഷനില്‍ പ്രവര്‍ത്തകര്‍ കേരള എക്‌സ്പ്രസ് തടഞ്ഞു. സംസ്ഥാന ട്രഷറര്‍ പി. ബിജു ഉദ്ഘാടനം ചെയ്തു. ജില്ലാ സെക്രട്ടറി ഐ. സാജു അധ്യക്ഷനായി. സംസ്ഥാനകമ്മിറ്റിയംഗങ്ങളായ ഐ.പി ബിനു, ബെന്‍ഡാര്‍വിന്‍, ബി. ഷാജു, ഷിജുഖാന്‍, ബാലമുരളി, കവിത സംസാരിച്ചു. വയനാട്, ഇടുക്കി ജില്ലകളില്‍ ബുധനാഴ്ച കേന്ദ്രസര്‍ക്കാര്‍ ഓഫിസ് മാര്‍ച്ച് നടത്തും. റെയില്‍വേ സ്വകാര്യവല്‍ക്കരണം ചെറുക്കുക, നിയമനനിരോധനം പിന്‍വലിക്കുക എന്നീ മുദ്രാവാക്യങ്ങള്‍ ഉയര്‍ത്തിയായിരുന്നു സമരം.