മാനന്തവാടി: മാനന്തവാടിയിലും പരിസരത്തും ഇന്നലെ 11 മുതല്‍ സൂര്യന്‍ നിറംമാറി കാണപ്പെട്ടതും പ്രകൃതി മഞ്ഞനിറത്തില്‍ ദൃശ്യമായതും പലയിടങ്ങളിലുമുണ്ടായ അഗ്നിബാധ മൂലമാണെന്ന് സൂചന.
നടവയല്‍ പരിയാരം പത്മനാഭന്‍ നമ്പ്യാരുടെ തോട്ടത്തിലും കര്‍ണാടകയിലെ ബന്ദിപ്പൂര്‍ കടുവാ സങ്കേതത്തിലും വന്‍ അഗ്നിബാധയുണ്ടായിരുന്നു. കൂടാതെ ചെമ്പ്ര മലനിരകളിലും അഗ്നിബാധയുണ്ടായിട്ടുണ്ട്. ഈ സാഹചര്യത്തിലാണ് മാനന്തവാടിയില്‍ സൂര്യന്‍ നിറം മങ്ങിയും പ്രകൃതി മഞ്ഞനിറത്തിലും കാണപ്പെട്ടതെന്നാണ് നിഗമനം. കല്‍ക്കര റെയ്ഞ്ചിലാണ് ഉച്ചയോടെ കാട്ടുതീ കണ്ടെത്തിയത്. വയനാട് വന്യജീവി സങ്കേതത്തില്‍നിന്ന് അഞ്ചു കി.മീറ്റര്‍ അകലെയാണ് കാട്ടുതീ കാണപ്പെട്ടത്. ഇതോടെ കുറിച്യാട്, ബത്തേരി റെയ്ഞ്ചുകളില്‍ സുരക്ഷ വര്‍ധിപ്പിക്കുകയും കൂടുതല്‍ വനപാലകരെ അതിര്‍ത്തിയില്‍ നിയോഗിക്കുകയും ചെയ്തിരുന്നു.