വെസ്റ്റ്ബാങ്ക്: ഫലസ്തീനിലെ ഇസ്‌റാഈല്‍ വിരുദ്ധ പോരാട്ടത്തിന്റെ പുതിയ പ്രതീകം കൗമാരക്കാരിയായ അഹദ് തമീമിയുടെ വിചാരണ ആരംഭിച്ചു. ഇസ്‌റാഈലിലെ സൈനിക കോടതിയില്‍ രഹസ്യമായാണു വിചാരണ നടക്കുന്നത്. രണ്ട് ഇസ്‌റാഈലി സൈനികരെ അടിക്കുകയും ചവിട്ടുകയും ചെയ്‌തെന്നു പറഞ്ഞാണ് 17കാരിയെ അറസ്റ്റ് ചെയ്തത്. ഇതിന്റെ വിഡിയോ റെക്കോര്‍ഡ് ചെയ്ത മാതാവ് സമൂഹമാധ്യമങ്ങളില്‍ പങ്കുവച്ചതോടെ വന്‍ പിന്തുണ ഇവര്‍ക്കു ലഭിച്ചിരുന്നു.
കഴിഞ്ഞ വര്‍ഷം ഡിസംബര്‍ 15ന് വെസ്റ്റ് ബാങ്കിലെ അധിനിവിഷ്ട പ്രദേശമായ നബി സലേഹില്‍ അഹദ് തമീമിയുടെ വീടിന്റെ മുന്നിലായിരുന്നു സംഭവം. എന്നാല്‍ അന്നു രാത്രി തമീമിയെയും മാതാവിനെയും ഇസ്‌റാഈല്‍ സൈന്യം അറസ്റ്റ് ചെയ്തിരുന്നു. ഇവരുടെ മാതാവിനെ പിന്നീട് വിട്ടയച്ചു. സമൂഹമാധ്യമങ്ങളിലൂടെ കുറ്റകൃത്യങ്ങള്‍ക്കു പ്രേരിപ്പിച്ചു എന്നതുള്‍പ്പെടെയുള്ള 12 കേസുകളാണ് അഹദ് തമീമിക്കെതിരേ ഇസ്‌റാഈല്‍ ചുമത്തിയിരിക്കുന്നത്.
കുറ്റക്കാരിയെന്നു തെളിയിക്കപ്പെടുകയാണെങ്കില്‍ ദീര്‍ഘകാലം ജയിലില്‍ കഴിയേണ്ടിവരും. ഇവരെ അടച്ചിട്ട മുറിയിലെ വിചാരണ നടത്താന്‍ ഇസ്‌റാഈല്‍ ജഡ്ജി ഉത്തരവിടുകയായിരുന്നു. മാധ്യമപ്രവര്‍ത്തകര്‍ ഉള്‍പ്പെടെയുള്ളവര്‍ക്കു കോടതിയിലേക്കു പ്രവേശനമുണ്ടായിരുന്നില്ല.
അധിനിവേശ വിരുദ്ധ പോരാട്ടത്തിന്റെ പ്രതീകമായ അഹദ് തമീമിയെ ജയിലില്‍നിന്നു മോചിപ്പിക്കണമെന്ന് മനുഷ്യവാകാശ സംഘടനയായ ആംനെസ്റ്റി ഇന്റര്‍നാഷനല്‍ ഉള്‍പ്പെടെയുള്ളവ ആവശ്യപ്പെട്ടിരുന്നു.