കായംകുളം:കണ്ടല്ലൂര്‍ ശരവണ സദനത്തില്‍ സുമേഷ് (30)നെ കൊലപ്പെടുത്തിയ കേസില്‍ പ്രതികള്‍ക്ക് രക്ഷപെടാന്‍ സഹായം ചെയ്തയാളെ അന്വേഷണ സംഘം അറസ്റ്റ് ചെയ്തു .
കണ്ടല്ലൂര്‍ മണിവേലിക്കടവ് പത്മാലയത്തില്‍ പ്രദീപ് ദേവസ്യ (45 )നെയാണ് കായംകുളം ഡി വൈ എസ് പി എന്‍ രാജേഷും സംഘവും അറസ്റ്റ് ചെയ്തത്.കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു.
പിടിയിലായ പ്രതി സെയ്ഫുമായി ഇയാള്‍ക്ക് അടുത്ത ബന്ധമുണ്ടെന്നും ഇയാളുടെ വീട്ടിലെ നിത്യ സന്ദര്‍ശകന്‍ ആയിരുന്നു സെയ്‌ഫെന്നും പോലീസ് പറഞ്ഞു.പ്രതികള്‍ക്ക് സംരക്ഷണം നല്‍കുകയും കൃത്യം നടത്തി വന്ന പ്രതികളെ വാഹനത്തില്‍ കയറ്റി ആലപ്പുഴയില്‍ എത്തിച്ച് രക്ഷപ്പെടാനും ഇയാള്‍ സഹായിച്ചതായി അന്വേഷണ സംഘം പറഞ്ഞു.കേസന്വേഷണത്തിന്റെ പ്രാഥമിക ഘട്ടത്തില്‍ തന്നെ പ്രദേശത്തെ പ്രമുഖനായ ഇയാളുടെ പങ്കിനെ കുറിച്ച് അന്വേഷണ സംഘത്തിന് വ്യക്തമായ വിവരങ്ങള്‍ ലഭിച്ചിരുന്നു.
കഴിഞ്ഞ ദിവസം കേസില്‍ അറസ്റ്റിലായ കായംകുളം സ്വദേശി സെയ്ഫ്,ഹാഷിം,റോഷന്‍ കണ്ടല്ലൂര്‍ സ്വദേശി വിഷ്ണുദേവ് എന്നിവരെ കോടതി റിമാന്‍ഡ് ചെയ്തിരുന്നു.വിശദമായ ചോദ്യം ചെയ്യലിനായി ഇവരെ കസ്റ്റഡിയില്‍ വിട്ട് കിട്ടണമെന്നാവശ്യവുമായി അന്വേഷണ സംഘം കോടതിയില്‍ അപേക്ഷ നല്‍കി ഇത് കോടതി തിങ്കളാഴ്ച പരിഗണിക്കും