നിലമ്പൂര്‍: എടവണ്ണ റെയ്ഞ്ചിലെ എടക്കോട് ഫോറസ്റ്റ് സ്‌റ്റേഷന്‍ പരിധിയിലെ വെണ്ണേക്കോട് മലവാരത്തിലെ മൂവായിരം വനമേഖല കഴിഞ്ഞ മൂന്ന് ദിവസമായി കാട്ടുതീയില്‍ കത്തിയമരുകയാണ്. പതിനാലാം ബ്ലോക്കിന് സമീപം മാണിക്കന്‍മുടിക്ക് താഴെ മണ്ണാത്തിപ്പാറയിലാണ് വ്യാപകമായി കാട്ടുതീ പടര്‍ന്ന് പിടിച്ചത്. അളക്കല്‍ ഭാഗത്തും കാട്ടുതീ പടരുകയാണ്.
പ്രധാന വനമേഖലകളില്‍ ഒന്നായ മൂവായിരം വനമേഖലയില്‍ മുളകളും എരംകോലുകളും വ്യാപകമായി കാട്ടുതീയില്‍ കത്തിയമര്‍ന്നു. പുല്‍മേടുകളും കാട്ടുതീ നക്കിതുടച്ചു. ആദിവാസി വനസംരക്ഷണ സമിതി വനംവകുപ്പുമായുള്ള തര്‍ക്കത്തെ തുടര്‍ന്ന് പിരിച്ചുവിട്ടിരുന്നു. ഇതിനാല്‍ ഈ മേഖലയില്‍ കാട്ടുതീ തടയുന്നതിന് നിലവില്‍ യാതൊരുസംവിധാനവുമില്ല.
കിലോമീറ്ററുകള്‍ക്കപ്പുറത്തുള്ള പെരുവമ്പാടം ഒപിയിലാണ് വനപാലകരുള്ളത്. അതിനാല്‍ തന്നെ തീയണക്കാന്‍ എത്തുക ഏറെ പ്രയാസകരമാണ്. മുന്‍ കാലങ്ങളില്‍ ആവശ്യത്തിന് ഫയര്‍ വാച്ചര്‍മാരുണ്ടായിരുന്നെങ്കിലും ഇക്കുറി ഇത് നാമമാത്രമാണ്. നിലമ്പൂര്‍ കാടുകളില്‍ മുന്‍പെങ്ങുമില്ലാത്തവിധം കാട്ടുതീ പടര്‍ന്ന് പിടിക്കുകയാണ്. വനംവകുപ്പിന് കാഴ്ചക്കാരായി നോക്കിനില്‍ക്കേണ്ട അവസ്ഥയാണ്. വരും മാസങ്ങളില്‍ വേനല്‍ കൂടുതല്‍ കടുക്കുന്ന സാഹചര്യത്തില്‍ വനംവകുപ്പിന്റെ ഭാഗത്തുനിന്നും കാര്യക്ഷമമായ ഇടപെടലുകളുണ്ടായില്ലെങ്കില്‍ വനം ഒന്നാകെ കാട്ടുതീ വിഴുങ്ങുന്ന അവസ്ഥയാണുണ്ടാകുക. വനാതിര്‍ത്തികളില്‍ ഭൂമിയുള്ള കര്‍ഷകകുടുംബങ്ങളും കാട്ടുതീ ഭീഷണിയിലാണ്. ഉള്‍വനത്തില്‍ തീ പടര്‍ന്നതോടെ വന്യമൃഗങ്ങളും സ്വയരക്ഷാര്‍ത്ഥം ജനവാസകേന്ദ്രങ്ങളിലേക്കെത്തുകയാണ്. നാട്ടുകാര്‍ വിവരമറിയിച്ചിട്ടും വനംവകുപ്പ് ഉദ്യോഗസ്ഥര്‍ സ്ഥലത്തെത്തിയിട്ടില്ല.