പോര്‍ട്ട് എലിസബത്ത്: സുനില്‍ ഗവാസ്‌കര്‍, സച്ചിന്‍ ടെണ്ടുല്‍കര്‍, സൗരവ് ഗാംഗുലി, വീരേന്ദര്‍ സെവാഗ് എന്നിങ്ങനെയുള്ള ലോക താരങ്ങള്‍ ക്രിക്കറ്റ് അടക്കി വാണിരുന്ന കാലത്തും എത്തിപ്പിടിക്കാനാവാത്ത ചരിത്ര നേട്ടം സ്വന്തം പേരിലെഴുതിച്ചേര്‍ത്താണ് ദക്ഷിണാഫ്രിക്കയില്‍നിന്ന് കോഹ്‌ലിയും സംഘവും മടങ്ങുക. 25 വര്‍ഷങ്ങള്‍ക്ക് ശേഷം ദക്ഷിണാഫ്രിക്കന്‍ മണ്ണില്‍ ഏകദിന പരമ്പരയില്‍ ചാംപ്യന്‍മാരായാണ് നീലപ്പട ചരിത്രത്തില്‍ ഇടം നേടിയത്.
ബൗളര്‍മാരേയും ബാറ്റ്‌സ്മാന്‍മാരേയും വിറപ്പിച്ചിരുന്ന ഇന്ത്യന്‍ താരങ്ങളുണ്ടായിരുന്നിട്ടും ദക്ഷിണാഫ്രിക്കയില്‍ മാത്രം ഇന്ത്യക്ക് വിജയക്കൊടി നാട്ടാനായിരുന്നില്ല. എന്നാല്‍ കഴിഞ്ഞദിവസത്തെ വിജയത്തോടെ ആ ചരിത്രവും തിരുത്തിക്കുറിച്ചിരിക്കുകയാണ് ഇന്ത്യയുടെ ചുണക്കുട്ടികള്‍. പരമ്പരയില്‍ ഒരു മത്സരം കൂടി ബാക്കി നില്‍ക്കെയാണ് ഇന്ത്യയുടെ ചരിത്ര നേട്ടം. അഞ്ചാം ഏകദിനത്തിലെ വിജയത്തോടെ ഏകദിന റാങ്കിങ്ങില്‍ ഒന്നാമതെത്താനും ഇന്ത്യക്കായി.
122 പോയിന്റോടെയാണ് ഇന്ത്യ ഒന്നാം സ്ഥാനത്തേക്കെത്തിയത്. 118 പോയിന്റുമായി ദക്ഷിണാഫ്രിക്ക രണ്ടാം സ്ഥാനത്തുണ്ട്. മൂന്ന് ഏകദിനത്തിലും ജയിച്ച ഇന്ത്യക്ക് നാലാം ഏകദിനത്തില്‍ ഈ അപൂര്‍വ നേട്ടം സ്വന്തമാക്കാമായിരുന്നെങ്കിലും ബാറ്റിങ്ങിലെ പാളിച്ചയാണ് റെക്കോര്‍ഡ് അഞ്ചാം ഏകദിനം വരെ നീട്ടിയത്. ടെസ്റ്റിലെ ഇന്ത്യയുടെ പരമ്പര നഷ്ടത്തിന് അക്കമിട്ട് മറുപടി കൊടുത്താണ് ഇന്ത്യ വെന്നിക്കൊടി പാറിച്ചത്. ആദ്യ രണ്ട് ഏകദിനത്തിലും ചാഹല്‍, കുല്‍ദീപ് എന്നിവരടങ്ങുന്ന ബോളിങ്ങ് നിരയാണ് ഇന്ത്യന്‍ വിജയത്തിന് ചുക്കാന്‍ പിടിച്ചത്.
മൂന്നാം ഏകദിനത്തില്‍ ബാറ്റുകൊണ്ടായിരുന്നു ഇന്ത്യയുടെ മറുപടി. നാലാം ഏകദിനത്തില്‍ ഇന്ത്യക്ക് തോല്‍ക്കേണ്ടി വന്നെങ്കിലും അഞ്ചാം ഏകദിനത്തോടെയാണ് ചരിത്ര നിയോഗം ഇന്ത്യക്കൊപ്പം നിന്നത്. അടുത്ത ഏകദിനത്തിലും ഇന്ത്യന്‍ ബൗളര്‍മാരെ നിരവധി റെക്കോര്‍ഡുകള്‍ കാത്തിരിക്കുന്നുണ്ട്.
വിദേശ മണ്ണില്‍ ഒരു ഏകദിന പരമ്പരയില്‍ കൂടുതല്‍ വിക്കറ്റ് വീഴ്ത്തുന്ന ബൗളര്‍ എന്ന റെക്കോര്‍ഡ് തിരുത്തിയാണ് കുല്‍ദീപും, ചാഹലും ആറാം ഏകദിനത്തിനിറങ്ങുന്നത്. ആറാം ഏകദിനത്തില്‍ കൂടി വിക്കറ്റുകള്‍ നേടാനായാല്‍ ചാഹലിന്റെയും കുല്‍ദീപിന്റെയും തൊപ്പിയിലെ പൊന്‍തൂവല്‍ കൂടിയാകും ദക്ഷിണാഫ്രിക്കയിലെ ഏകദിന പരമ്പര.
ശ്രീലങ്കന്‍ ഏകദിനത്തില്‍ മുന്നില്‍നിന്ന് പടനയിച്ച രോഹിത് ശര്‍മയുടെ ബാറ്റിന്റെ മൂര്‍ച്ച കുറഞ്ഞത് ഇന്ത്യക്ക് കാര്യമായ പ്രത്യാഘാതങ്ങളൊന്നുമുണ്ടാക്കിയിരുന്നില്ല.
എന്നാല്‍ അഞ്ചാം ഏകദിനത്തില്‍ രോഹിത്തും കോഹ്‌ലിയും ബാറ്റു കൊണ്ട് മറുപടികൊടുത്താണ് ഇന്ത്യന്‍ സംഘത്തിന്റെ പേര് ചരിത്രത്തില്‍ എഴുതിച്ചേര്‍ത്തത്.