കരുനാഗപ്പള്ളി: സംസ്ഥാന സര്‍ക്കാറിന്റെ 2015-16 വര്‍ഷത്തെ മികച്ച ഗ്രാമ പഞ്ചായത്തിനുളള സ്വരാജ് ട്രോഫി കുലശേഖരപുരം ഗ്രാമ പഞ്ചായത്തിന്. എ. നാസറുദ്ദീന്‍ ജില്ലയിലെ മികച്ച പഞ്ചായത്ത് സെക്രട്ടറിക്കുള്ള അവാര്‍ഡിനും അര്‍ഹനായി. ഇക്കാലയളവിലെ കുലശേഖരപുരം പഞ്ചായത്ത് സെക്രട്ടറിയും ഇപ്പോള്‍ കുന്നത്തൂര്‍ പഞ്ചായത്ത് സെക്രട്ടറിയുമാണ് നാസറുദ്ദീന്‍. ശ്രീലേഖ കൃഷ്ണകുമാറാണ് പഞ്ചായത്ത് പ്രസിഡന്റ്. പത്ത് ലക്ഷം രൂപയാണ് അവാര്‍ഡായി പഞ്ചായത്തിന് ലഭിക്കുക. 2011-12 മുതല്‍ 2013-14 വരെ തുടര്‍ച്ചയായി ജില്ലയിലെ മികച്ച ഗ്രാമപഞ്ചായത്ത് അവാര്‍ഡ് കുലശേഖരപുരത്തിനായിരുന്നു. ഈ കാലയളവില്‍ മികച്ച പഞ്ചായത്ത് സെക്രട്ടറിയ്ക്കുള്ള അവാര്‍ഡും എ. നാസറുദ്ദീനായിരുന്നു.
2014-15 വര്‍ഷത്തെ സംസ്ഥാനത്തെ മികച്ച ഗ്രാമ പഞ്ചായത്ത് സെക്രട്ടറിക്കുള്ള അവാര്‍ഡ് എ.നാസറുദ്ദീന് ലഭിച്ചിരുന്നു. 2014-15 ലെ കേന്ദ്ര സര്‍ക്കാറിന്റെ മികച്ച പഞ്ചായത്തിനുള്ള ദേശീയ അവാര്‍ഡായ ശശാ കതീ കരണ്‍ പുരസ്‌കാര്‍ കുലശേഖരപുരത്തിന് ലഭിച്ചപ്പോള്‍ പ്രസിഡന്റ് ശ്രീലേഖ കൃഷ്ണകുമാറും സെക്രട്ടറി എ.നാസറുദ്ദീനും വൈ: പ്രസി: സുജിതനാസറും ചേര്‍ന്നാണ് ജാര്‍ഖണ്ഡില്‍ വച്ച് ഏറ്റുവാങ്ങിയത്. നൂറ് ശതമാനം പദ്ധതി വിഹിതം ചെലവഴിച്ചതും കാര്‍ഷിക മേഖലയില്‍ നിരവധി നൂതനപദ്ധതികളും ആരോഗ്യരംഗത്ത് പാലിയേറ്റീവ് കെയര്‍ ഉള്‍പ്പെടെയുള്ള പദ്ധതികളും വിജയകരമായി നടപ്പാക്കിയ യതും പൊതുജന സേവനം മുന്‍നിര്‍ത്തി മികച്ച ഫ്രണ്ട് ഓഫിസ് പ്രവര്‍ത്തനവും മികച്ച ഗുണനിലവാരമുളള സര്‍വിസ് നല്‍കുന്നതിന് ഐ.എസ്.ഒ സര്‍ട്ടിഫിക്കേഷനും 2010-11 മുതല്‍ തുടര്‍ച്ചയായി നികുതിപിരിച്ചെടുത്ത് സമര്‍ത്ഥമായി വികസന പ്രവര്‍ത്തനങ്ങള്‍ക്ക് വിനിയോഗിച്ചതും കണക്കിലെടുത്താണ് അവാര്‍ഡ് നല്‍കിയിട്ടുള്ളത്. 2017 ഫെബ്രുവരി 19 കണ്ണൂരില്‍ വച്ച് നടക്കുന്ന പഞ്ചായത്ത് ദിനാഘോഷ ചടങ്ങില്‍ മുഖ്യമന്ത്രി അവാര്‍ഡ് സമ്മാനിക്കും.